கல்லணை கொள்ளிடம் ஆற்றில் புதிய பாலம்: 42 மீட்டர் நீள உத்தரங்களை ராட்சத எந்திரங்கள் மூலம் பொருத்தும் பணி தீவிரம்

திருக்காட்டுப்பள்ளி,

தஞ்சை மாவட்டம் கல்லணையில் உள்ள காவிரி, வெண்ணாறு, கல்லணைகால்வாய், கொள்ளிடம் ஆற்றுப்பாலங்களில் கனரக வாகன போக்கு வரத்து தடை செய்யப்பட்டுள்ளது. தஞ்சை மாவட்டத்தில் இருந்து திருச்சிக்கு செல்ல கல்லணையின் கிழக்கு பகுதியில் இறங்கி நடந்து பாலங்களை கடந்து சென்று கல்லணையின் மேற்கு பகுதியில் பஸ் ஏறி செல்ல வேண்டும். இதனால் மக்கள் மிகவும் சிரமப்பட்டு வந்தனர்.

கல்லணையில் தஞ்சை- திருச்சி மாவட்டங்களை இணைக்கும் வகையில் கனரக வாகன போக்குவரத்துக்காக புதிய பாலம் கட்ட வேண்டும் என முன்னாள் எம்.எல்.ஏ. ரெத்தினசாமி சட்டசபையில் கோரிக்கை விடுத்தார். அவரது கோரிக்கையை ஏற்று முன்னாள் முதல்-அமைச்சர் ஜெயலலிதா திருச்சி-தஞ்சை மாவட்டங்களை இணைக்கும் வகையில் கல்லணையில் உள்ள கொள்ளிடம் ஆற்றில் பாலம் கட்டப்படும் என்று அனுமதி வழங்கினார்.

இதன்படி புதிய பாலம் கட்ட பூமிபூஜை கடந்த 2016-ம் ஆண்டு டிசம்பர் மாதம் 3-ந் தேதி நடைபெற்றது. 1052 மீட்டர் நீளமுள்ள இந்த பாலம் தஞ்சை மாவட்டம் கல்லணையில் உள்ள கொள்ளிடம் பாலத்துக்கு எதிரில் திருச்சி மாவட்டம் கிளிக்கூடு கிராமத்தில் இருந்து தஞ்சை மாவட்டம் தோகூர் போலீஸ் நிலையம் அருகே முடியும் வகையில் அமைக்க பணிகள் தொடங்கியது. இந்த பாலத்தில் 25 பிரமாண்ட தூண்கள் அமைக்கப்பட்டன. தூண்களுக்கு இடையில் வைப்பதற்கான உத்தரங்கள் 42 மீட்டர் நீளத்தில் புதிய தொழில் நுட்பத்தில் அதிர்வுகளை தாங்கும் வகையில் அமைக்கப்பட்டன. கடந்த ஆண்டு தூண்களில் மேல் உத்தரங்களை வைக்க தொடங்கியபோது கொள்ளிடம் ஆற்றில் பெருக்கெடுத்து ஓடிய வெள்ளத்தால் பாலப்பணிகள் நிறுத்தப்பட்டன. மேலும் கொள்ளிடம் ஆற்றில் அமைக்கப்பட்டிருந்த உத்தரங்கள் ஒன்றின் மீது ஒன்று உரசி சேதமடைந்தன. சேதமடைந்த உத்தரங்களுக்கு பதிலாக புதிய உத்தரங்கள் அமைக்கப்பட்டன.

புதிதாக அமைக்கப்பட்ட உத்தரங்களை கல்லணை கொள்ளிடம் புதிய பாலத்தின் தூண்களுக்கு இடையே தூக்கி வைக்கும் பணிகள் தற்போது நடைபெற்று வருகின்றன. இதற்காக 2 ராட்சத எந்திரங்கள் கொண்டு வரப்பட்டு 42 மீட்டர் நிளமுள்ள உத்தரங்களை அப்படியே தூக்கி தூண்களுக்கு இடையே வைக்கும் பணிகள் மும்முரமாக நடைபெற்று வருகின்றன. மொத்தம் 1052 மீட்டர் நீளமுள்ள பாலத்தில் பெரும்பாலான உத்தரங்கள் வைக்கப்பட்டு விட்டன. மீதி உள்ள உத்தரங்களை வைக்கும் பணிகள் நடைபெற்று வருகின்றன.

கல்லணையில் புதிய பாலம் அமைக்கப்பட்டால் பூம்புகாரில் இருந்து ஸ்ரீரங்கம் வரை நேரடியாக கனரக பஸ் போக்கு வரத்து வசதி செய்யமுடியும். திருக்காட்டுப்பள்ளி, திருவையாறில் இருந்து திருச்சி சத்திரம் பஸ் நிலையத்துக்கு மிக எளிதில் சென்று வர இயலும். எனவே பாலப்பணிகளை விரைந்து முடித்து பொதுமக்கள் பயன்பாட்டுக்கு திறந்து விடவேண்டும் என்று பொதுமக்கள் கோரிக்கை விடுத்துள்ளனர்.