புதுச்சத்திரத்தில் மொபட் மீது பஸ் மோதல்; விவசாயி சாவு

பரங்கிப்பேட்டை, 

புதுச்சத்திரம் அருகே சின்னான்டிகுழி கிராமத்தை சேர்ந்தவர் காமராஜ் (வயது 50). விவசாயி. இவர் நேற்று முன்தினம் வீட்டுக்கு தேவையான பொருட்களை வாங்க மொபட்டில் புதுச்சத்திரம் கடை வீதிக்கு சென்றார். அங்குள்ள கடையில் பொருட் களை வாங்கி கொண்டு மொபட்டில் வீடு திரும்பினார். புதுச்சத்திரம் மெயின்ரோட்டில் சென்று கொண்டிருந்தபோது, அந்த வழியாக வந்த தனியார் சொகுசு பஸ் மொபட் மீது மோதியது. இந்த விபத்தில் தூக்கி வீசப்பட்டு படுகாயம் அடைந்த காமராஜ் சம்பவ இடத்திலேயே பரிதாபமாக இறந்தார். இது குறித்த தகவலின் பேரில் புதுச்சத்திரம் போலீஸ் இன்ஸ்பெக்டர் அமுதா மற்றும் போலீசார் சம்பவ இடத்துக்கு விரைந்து வந்து விசாரணை நடத்தினர்.

இதனிடையே விபத்து குறித்து தகவல் அறிந்த காமராஜின் உறவினர்கள் சம்பவ இடத்துக்கு வந்து அவரது உடலை பார்த்து கதறி அழுதனர். இதையடுத்து காமராஜின் உடலை போலீசார் கைப்பற்றி பிரேத பரிசோதனைக்காக கடலூர் அரசு மருத்துவமனைக்கு அனுப்பி வைத்தனர். இது குறித்த புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.