தகராறை தட்டிக்கேட்ட கல்லூரி மாணவர் கத்தியால் குத்திக்கொலை; 2 பேர் காயம் 3 பேர் கைது

பெரம்பலூர்,

பெரம்பலூர் அருகே உள்ள எளம்பலூர் வடக்கு தெருவை சேர்ந்தவர் சண்முகம். இவரது மகன் பாஸ்கர் (வயது 17). இவர் பெரம்பலூரில் உள்ள தனியார் பாலிடெக்னிக் கல்லூரியில் ஆட்டோ மொபைல் 2-ம் ஆண்டு படித்து வந்தார். பாஸ்கர் நேற்று முன்தினம் இரவு தனது உறவினர் பழனிசாமியின் மகன்களான பிரகாஷ் (24), பிளஸ்-2 படிக்கும் ராஜேஷ் ஆகியோருடன் எளம்பலூர் வடக்கு தெரு முக்கம் அருகே கேரம்போர்டு விளையாடிக் கொண்டிருந்தார்.

அப்போது அவர்கள் அருகே பிரகாஷ், ராஜேஷ் ஆகியோரின் மாமாவான தர்மதுரை நின்று கொண்டிருந்தார். இந்நிலையில் அங்கு ஒரே மோட்டார் சைக்கிளில் அதே பகுதியை சேர்ந்த குருசாமி மகன் கோபிநாத் (21), ராஜாராமன் (39), எசனையை சேர்ந்த நல்லுசாமி மகன் கார்த்திகேயன் (20) ஆகியோர் வந்தனர். அவர்கள் 3 பேரும் சமீபத்தில் அந்த பகுதியில் நடந்த ஒரு விபத்து தொடர்பாக தர்மதுரையிடம் வாக்குவாதத்தில் ஈடுபட்டு தகராறு செய்தனர். மேலும், அவரை அடிக்க பாய்ந்தனர்.

இதனைக் கண்ட பிரகாஷ், ராஜேஷ், பாஸ்கர் ஓடிச்சென்று தர்மதுரையை அடிப்பதை, அவர்களிடம் தட்டிக் கேட்டனர். இதில் ஆத்திரமடைந்த கோபிநாத், ராஜாராமன், கார்த்திகேயன் ஆகியோர், பாஸ்கர், பிரகாஷ், ராஜேஷ் ஆகியோரிடம் வாக்குவாதத்தில் ஈடுபட்டு தகராறில் ஈடுபட்டனர்.

தகராறு முற்றியதில் கோபிநாத், ராஜாராமன், கார்த்திகேயன் ஆகியோர் சேர்ந்து பாஸ்கர், பிரகாஷ், ராஜேஷ் ஆகியோரை தகாத வார்த்தையால் திட்டி, கத்தியால் சரமாரியாக குத்தினர். பின்னர் அவர்கள் அங்கிருந்து மின்னல் வேகத்தில் தப்பி சென்றனர். கத்திக் குத்தில் படுகாயமடைந்த பாஸ்கர், பிரகாஷ், ராஜேஷ் ஆகியோர் ரத்த வெள்ளத்தில் உயிருக்கு போராடிக் கொண்டிருந்தனர்.

இதுகுறித்து தகவலறிந்து அங்கு விரைந்து வந்த அக்கம், பக்கத்தினர் படுகாயமடைந்தவர்களை உடனடியாக மீட்டு சிகிச்சைக்காக பெரம்பலூர் அரசு மருத்துவமனைக்கு அனுப்பி வைத்தனர். இதில் மேல்சிகிச்சைக்காக பாஸ்கர், பிரகாஷ் ஆகியோரை நள்ளிரவில் திருச்சி அரசு மருத்துவமனைக்கு அனுப்பி வைத்தனர். ஆனால் செல்லும் வழியிலேயே பாஸ்கர் பரிதாபமாக உயிரிழந்தார்.

பிரகாஷ் திருச்சி அரசு மருத்துவமனையிலும், ராஜேஷ் பெரம்பலூர் அரசு மருத்துவமனையிலும் சிகிச்சை பெற்று வருகின்றனர். இது தொடர்பாக பெரம்பலூர் போலீசார் வழக்குப்பதிவு செய்து கோபிநாத், ராஜாராமன், கார்த்திகேயன் ஆகியோரை நேற்று கைது செய்து தொடர்ந்து விசாரணை நடத்தி வருகின்றனர்.

கைதான கோபிநாத், ராஜாராமன் ஆகியோர் கொத்தனாராகவும், கார்த்திகேயன் டிரைவராகவும் வேலை பார்த்து வருவது விசாரணையில் தெரியவந்தது. இந்த கொலை சம்பவம் அந்த பகுதியில் பெரும் பரபரப்பை ஏற்படுத்தி உள்ளது.