பாப்பாரப்பட்டி அருகே ரோட்டை கடக்க முயன்றபோது கார் மோதி சிறுமி பலி

பாப்பாரப்பட்டி,

தர்மபுரி மாவட்டம் பாப்பாரப்பட்டி அருகே உள்ள பாடி கிராமத்தை சேர்ந்தவர் முருகன். விவசாயி. இவருடைய மகள் மைவிழி (வயது8). சிறுமி பூகானஅள்ளி கிராமத்தில் உள்ள ஊராட்சி ஒன்றிய தொடக்கப்பள்ளியில் 3-ம் வகுப்பு படித்து வந்தாள். இவள் நேற்று பூசாரிகொட்டாய் பகுதியில் உள்ள கடைக்கு சென்றாள். அங்கு பொருட்கள் வாங்கிக்கொண்டு சிறுமி ரோட்டை கடக்க முயன்றாள்.

அப்போது பாப்பாரப்பட்டியில் இருந்து தர்மபுரி நோக்கி வந்த கார், சிறுமி மைவிழி மீது எதிர்பாராதவிதமாக மோதியது. இந்த விபத்தில் சிறுமி தூக்கி வீசப்பட்டு சம்பவ இடத்திலேயே பரிதாபமாக இறந்தாள். இதுகுறித்து தகவல் அறிந்ததும் ஏராளமான பொதுமக்கள் அந்த பகுதியில் திரண்டனர்.

அவர்கள் பூசாரிகொட்டாய் பகுதியில் விபத்து நடந்த இடத்தில் வேகத்தடை அமைக்க வேண்டும் என்று வலியுறுத்தி திடீரென சாலை மறியலில் ஈடுபட்டனர். இதுகுறித்து தகவல் அறிந்ததும் பாப்பாரப்பட்டி போலீசார் சம்பவ இடத்திற்கு சென்று பொதுமக்களிடம் பேச்சுவார்த்தை நடத்தினர். அப்போது வேகத்தடை அமைக்க நடவடிக்கை எடுக்கப்படும் என்று போலீசார் தெரிவித்தனர். இதையடுத்து அவர்கள் மறியலை கைவிட்டு கலைந்து சென்றனர்.

பின்னர் போலீசார், விபத்தில் இறந்த சிறுமியின் உடலை கைப்பற்றி பிரேத பரிசோதனைக்காக தர்மபுரி அரசு ஆஸ்பத்திரிக்கு அனுப்பி வைத்தனர். கார் டிரைவரான சேலத்தை சேர்ந்த முருகன் மீது போலீசார் வழக்குப்பதிவு செய்து விசாரணை நடத்தி வருகின்றனர். கார் மோதி சிறுமி இறந்த சம்பவம் அந்த பகுதியில் சோகத்தை ஏற்படுத்தியது.