புதுச்சேரி சட்டசபை 22-ந் தேதி கூடுகிறது
புதுச்சேரி சட்டசபை வருகிற 22-ந் தேதி கூடுவதாக அதிகாரபூர்வமாக அறிவிக்கப்பட்டுள்ளது.
புதுச்சேரி,
புதுவை சட்டசபையில் ஆண்டுதோறும் மார்ச் மாதத்தில் பட்ஜெட் தாக்கல் செய்யப்படுவது வழக்கம். ஆனால் கடந்த 8 ஆண்டுகளுக்கு மேலாக இடைக்கால பட்ஜெட்டே தாக்கல் செய்யப்பட்டு வருகிறது. அதன்பின் சில மாதங்களில் முழுமையான பட்ஜெட் தாக்கல் செய்யப்படுவது வழக்கமாக இருந்து வருகிறது.
இந்த ஆண்டு நாடாளுமன்ற தேர்தல் வந்ததால் கடந்த மார்ச் மாதம் 2-ந் தேதியன்று 5 மாதங்களுக்கு (ஏப்ரல் முதல் ஆகஸ்டு முடிய) அரசின் செலவினங்களுக்கு தேவையான இடைக்கால பட்ஜெட்டை சட்டசபையில் முதல்-அமைச்சர் நாராயணசாமி தாக்கல் செய்தார். அதன்பின் கடந்த ஜூன் மாதம் 3-ந் தேதி புதுவை சட்டசபை கூடியது.
இந்த கூட்டத்தில் புதிய சபாநாயகராக சிவக்கொழுந்து பதவியேற்று கொண்டார்.
இந்தநிலையில் புதுவை மாநிலத்தின் பட்ஜெட் தொகையை இறுதி செய்ய மாநில திட்டக்குழு தலைவரும் கவர்னருமான கிரண்பெடி தலைமையில் கடந்த 13-ந் தேதி திட்டக்குழு கூட்டம் நடைபெற்றது. அந்த கூட்டத்தில் மாநிலத்தின் பட்ஜெட் தொகை ரூ.8 ஆயிரத்து 425 கோடியாக ஆக இருக்கும் என முடிவு செய்யப்பட்டது.
இதுதொடர்பான அறிக்கை மத்திய அரசின் ஒப்புதலுக்கு அனுப்பி வைக்கப்பட்டுள்ளது. எனவே விரைவில் சட்டசபை கூடி பட்ஜெட் தாக்கல் செய்யப்படும் என்று அனைத்து தரப்பினராலும் எதிர்பார்க்கப்பட்டது.
அந்த வகையில் புதுவை சட்டசபை வருகிற 22-ந் தேதி காலை 9.35 மணிக்கு கூடுகிறது. இதற்கான அதிகாரபூர்வ அறிவிப்பை சட்டசபை செயலாளர் வின்சென்ட் ராயர் நேற்று வெளியிட்டார்.
இந்த சட்டசபை கூட்டத்தில் பட்ஜெட் தாக்கல் செய்யப்படமாட்டாது. அன்றைய கூட்டத்தில் மாநிலத்தின் நீர் மேலாண்மை குறித்து விவாதிக்கப்பட உள்ளது. ஓரிரு நாட்கள் மட்டுமே இந்த கூட்டம் நடைபெறும் என்று தெரிகிறது. பட்ஜெட்டிற்கு மத்திய அரசு ஒப்புதல் அளித்ததும் மீண்டும் சட்டசபை பட்ஜெட் கூட்டத்தொடர் நடைபெறும். இந்த கூட்டத்தொடரின் தொடக்கத்தில் கவர்னர் உரையாற்றுவார்.
Related Tags :
Next Story