எங்களுடன் வந்துவிடுங்கள் என ஸ்ரீராமுலுவுக்கு குமாரசாமி அழைப்பு டி.கே.சிவக்குமாரும் சந்தித்து பேசியதால் பரபரப்பு

பெங்களூரு,

கர்நாடக சட்டசபையில் நேற்று நம்பிக்கை வாக்கெடுப்பு நடத்தப்படும் என்று அறிவிக்கப்பட்டு இருந்தது. இதன் மீது சட்டசபையில் விவாதம் நடைபெற்றது. இந்த நிலையில், மதியம் 1 மணியளவில் உணவு இடைவேளையில் சாப்பிடுவதற்காக ஆளும், எதிர்க்கட்சி எம்.எல்.ஏ.க்கள் சட்டசபையில் இருந்து வெளியே புறப்பட்டு சென்றுவிட்டனர். அப்போது முதல்-மந்திரி குமாரசாமி, துணை முதல்-மந்திரி பரமேஸ்வர், மந்திரி டி.கே.சிவக்குமார் மற்றும் சில கூட்டணி கட்சி எம்.எல்.ஏ.க்களும் ஒன்றாக நின்று பேசிக் கொண்டிருந்தனர்.

அந்த சந்தர்ப்பத்தில் எதிர்க்கட்சி வரிசையில் பா.ஜனதாவை சேர்ந்த ஸ்ரீராமுலு எம்.எல்.ஏ., மட்டும் தனியாக அமர்ந்திருந்தார். இதை பார்த்த முதல்-மந்திரி குமாரசாமி, ஸ்ரீராமுலுவை பார்த்து ஏன் தனியாக இருந்து சிந்திக்கிறீர்கள், எங்களுடன் வந்து சேர்ந்து கொள்ளுங்கள் என்று கூறினார்.

அப்போது ஸ்ரீராமுலுவை பார்த்து, துணை முதல்-மந்திரி பதவி உங்களுக்கு கிடைக்காது, ரமேஷ் ஜார்கிகோளிக்கு தான் துணை முதல்-மந்திரி பதவி கிடைக்கும் என்று மந்திரி டி.கே.சிவக்குமார் கூறினார். அதாவது பா.ஜனதா ஆட்சி அமைந்தால், ஸ்ரீராமுலுவுக்கு துணை முதல்-மந்திரி பதவி கிடைக்க வாய்ப்பில்லை, காங்கிரஸ் அதிருப்தி எம்.எல்.ஏ. ரமேஷ் ஜார்கிகோளிக்கு தான் அந்த பதவி கிடைக்கும் என்று மந்திரி டி.கே.சிவக் குமார் கிண்டலாக கூறி இருந்தார்.

உடனே ஸ்ரீராமுலு சிரித்தபடியே துணை முதல்-மந்திரி பதவி அல்ல, முதல்-மந்திரி பதவி கொடுத்தாலும் உங்களுடன் வரமாட்டேன் என்று குமாரசாமி மற்றும் டி.கே.சிவக்குமாரை பார்த்து சொன்னார். பின்னர் மந்திரி டி.கே.சிவக்குமார் எழுந்து வந்து ஸ்ரீராமுலுவை சந்தித்து 4 நிமிடங்கள் பேசிவிட்டு சென்றார். சட்டசபையில் நடந்த இந்த நிகழ்வு நேற்று பரபரப்பாக பேசப்பட்டது.