வானவில் : விரைவில் வருகிறது ஹூண்டாய் ஜெனிசிஸ்

ஹூண்டாய் நிறுவனத்தின் சொகுசு கார்கள் அனைத்துமே ‘ஜெனிசிஸ்’ என்ற பெயரில் தயாரிக்கப்படுகின்றன. தற்போது சர்வதேச அளவில் ஜி 70, ஜி 80 மற்றும் ஜி 90 ரக செடான் கார்கள் மட்டுமே புழக்கத்தில் உள்ளன. விரைவிலேயே இப்பிரிவு 2 மாடல் எஸ்.யு.வி. கார்களை அறிமுகம் செய்ய உள்ளது. இதில் முதல் மாடல் ஜி.வி 80 என்ற பெயரில் வெளியாகிறது. மற்றொன்று ஜி.வி 70 என்ற பெயரில் தயாராகிறது.

இந்திய சந்தையில் எஸ்.யு.வி. மாடல்களுக்கு மிகுந்த வரவேற்பு இருப்பதைத் தொடர்ந்து ஹூண்டாய் நிறுவனம் ஜெனிசிஸ் பிராண்டில் எஸ்.யு.வி. மாடலையே அறிமுகம் செய்யத் திட்டமிட்டுள்ளது.

இத்தகைய மாடல்கள் பெரும்பாலும் சி.கே.டி. மூலமாக அதாவது முழுவதும் அசெம்பிள் செய்யப்பட்ட காராக இறக்குமதி செய்யத் திட்டமிடப்பட்டுள்ளது. இந்திய நிறுவனங்கள் 2,500 கார்கள் வரை இறக்குமதி செய்ய விதிகள் தளர்த்தப்பட்டுள்ளன.

தற்போதைக்கு ஜி.வி 80 மாடல் கார்கள் அனைத்துமே வெளிநாடுகளுக்கென தயாரிக்கப்படுவதால், இவை அனைத்துமே இடது பக்க ஸ்டீரிங் கொண்டவையாக உள்ளன. இந்தியாவுக்காக இறக்குமதி செய்யப்படும்போது, ஸ்டீரிங் பகுதியில் மட்டும் மாற்றம் செய்யப்பட்டு விற்பனை செய்ய திட்டமிடப்பட்டுள்ளது. ஜி.வி70 மாடலைப் பொறுத்தமட்டில் டக்ஸன் மாடலின் மேம்படுத்தப்பட்டதாக இருப்பதால் இதில் வலதுபக்க ஸ்டீரிங் கொண்ட கார்கள் உள்ளன. எனவே ஜி.வி70 மாடலை இந்தியாவுக்கு இறக்குமதி செய்து எவ்வித மாற்றமும் செய்யாமல் விற்பனை செய்யலாம். விரைவிலேயே இந்திய சாலைகளில் ஹூண்டாய் நிறுவனத்தின் பிரீமியம் எஸ்.யு.வி.க்கள் வலம் வருவது நிச்சயம்.

ஹூண்டாய் நிறுவனம் சமீபத்தில் பேட்டரியில் ஓடும் ‘கோனா’ என்ற பெயரிலான புதிய மாடல் எஸ்.யு.வி.யை அறிமுகம் செய்தது. இதன் விலை ரூ.25.30 லட்சமாக உள்ளது. இந்த மாடலை அப்படியே வெளிநாட்டிலிருந்து இறக்குமதி செய்யத் திட்டமிட்டுள்ளது. அதேசமயம் பெரும்பான்மை மக்கள் பயன்படுத்தும் வகையில் குறைந்த விலையில் பேட்டரி கார்களை அறிமுகம் செய்ய முடிவு செய்துள்ளது.

கொரியாவில் உள்ள ஹூண்டாய் நிறுவனம் 2025-ம் ஆண்டுக்குள் 25 மாடல் பேட்டரி கார்களைத் தயாரிக்க இலக்கு நிர்ணயித்து உள்ளது. இதில் சிறிய ரகக் கார்களும் அடங்கும். அத்தகைய சிறிய ரகக் கார்களை, விலை குறைவாக இருப்பின் அவற்றை இந்தியாவில் விற்பனை செய்யவும், பேட்டரி வாகன உபயோகிப்பு அதிகரிக்கும்போது அவற்றை இந்தியாவிலேயே தயாரிக்கவும் இந்நிறுவனம் திட்டமிட்டு வருகிறது.