<
மகள் திருமணத்திற்காக பரோலில் வந்துள்ள நளினி, போலீஸ் நிலையத்தில் கையெழுத்திட்டார் உறவு பெண்ணுடன் ‘செல்பி’ எடுத்து மகிழ்ச்சி
மகள் திருமண ஏற்பாட்டிற்காக பரோலில் வந்துள்ள நளினி, நேற்று சத்துவாச்சாரி போலீஸ் நிலையத்திற்கு நேரில் சென்று கையெழுத்திட்டார்.
வேலூர்,
முன்னாள் பிரதமர் ராஜீவ்காந்தி கொலை வழக்கில் தண்டனை பெற்ற முருகன், நளினி ஆகியோர் வேலூர் மத்திய சிறையில் அடைக்கப்பட்டனர். கடந்த 28 ஆண்டுகளாக சிறையில் தண்டனை அனுபவித்து வரும் இவர்களுக்கு ஹரித்திரா என்ற மகள் இருக்கிறார். இவர் லண்டனில் டாக்டருக்கு படித்துள்ளார்.
இவருக்கு திருமணம் செய்ய முடிவு செய்துள்ளனர். இதற்கான ஏற்பாடுகள் நடைபெற்று வருகிறது. மகளுக்கு திருமண ஏற்பாடுகள் செய்ய, வேலூர் பெண்கள் சிறையில் உள்ள நளினி 6 மாதம் பரோல் கேட்டு சென்னை ஐகோர்ட்டில் மனுதாக்கல் செய்திருந்தார். இந்த மனு மீதான விசாரணை கடந்த 5-ந் தேதி நடந்தது.
அப்போது நளினி கோர்ட்டில் நேரில் ஆஜராகினார். அவருக்கு ஒரு மாதம் பரோல் வழங்கப்பட்டது. அதைத்தொடர்ந்து வேலூர் பெண்கள் சிறையில் இருந்து நேற்று முன்தினம் நளினி பரோலில் வெளியே வந்தார். அவர் சத்துவாச்சாரி ரங்காபுரம் புலவர் நகரில் உள்ள திராவிடர் இயக்க தமிழர் பேரவை இயக்கத்தை சேர்ந்த சிங்கராயர் என்பவருடைய வீட்டில் தங்கி உள்ளார்.
அவர் தங்கி உள்ள வீட்டை சுற்றிலும் துணை போலீஸ் சூப்பிரண்டு மணிமாறன் தலைமையில் துப்பாக்கி ஏந்திய போலீஸ் பாதுகாப்பு போடப்பட்டுள்ளது. அவர்கள் 24 மணி நேரமும் சுழற்சி முறையில் பாதுகாப்பு பணியில் ஈடுபட்டு வருகிறார்கள்.
ஒரு மாதம் பரோலில் வந்துள்ள நளினி சத்துவாச்சாரி போலீஸ் நிலையத்தில் தினமும் ஒரு முறை நேரில் ஆஜராகி கையெழுத்திட வேண்டும், ஊடகங்களுக்கு பேட்டியளிக்கக்கூடாது, அரசியல் கட்சி தலைவர்களை சந்திக்கக்கூடாது என்பது உள்பட 12 நிபந்தனைகள் விதிக்கப்பட்டுள்ளது.
அதன்படி, அவர் நேற்று முதல் முறையாக சத்துவாச்சாரி போலீஸ் நிலையத்துக்கு கையெழுத்திட வந்தார். சுடிதார் அணிந்து வந்த நளினியை துணை போலீஸ் சூப்பிரண்டு மணிமாறன் தலைமையில் துப்பாக்கி ஏந்திய போலீசார் சத்துவாச்சாரி போலீஸ் நிலையத்துக்கு வேனில் அழைத்து வந்தனர்.
சரியாக 11.30 மணிக்கு போலீஸ் நிலையத்துக்கு வந்தார். அங்கு இன்ஸ்பெக்டர் அழகுராணி முன்னிலையில் கையெழுத்திட்டார். உடனே அங்கிருந்து மீண்டும் அவர் தங்கியிருக்கும் வீட்டுக்கு அழைத்து செல்லப்பட்டார்.
மகள் திருமணத்திற்காக பரோலில் வந்துள்ளதால் நளினி மிகவும் மகிழ்ச்சியுடன் இருக்கிறார். அவருடன் உறவினர்களும் தங்கி உள்ளனர். பரோலில் வந்த முதல் நாளிலேயே அவர் தனது உறவுக்கார பெண்ணுடன் ‘செல்பி’ எடுத்து மகிழ்ச்சியை வெளிப்படுத்தி உள்ளார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
