தசை சிதைவு நோயினால் பாதிக்கப்பட்ட 3 சகோதரர்கள் குடும்பத்திற்கு புதிய வீடு கட்டுமான பணியை கலெக்டர் தொடங்கி வைத்தார்

கலசபாக்கம்,

கலசபாக்கம் தாலுகா காம்பட்டு கிராமத்தை சேர்ந்தவர் ஏழுமலை (வயது 45). இவரது மனைவி ஜெயசாந்தி (38). இவர்களுக்கு சிவக்குமார் (18), செல்வம் (16), நந்தகோபால் (13) என 3 மகன்கள் உள்ளனர். ஏழுமலையும், ஜெயசாந்தியும் தங்களுக்கு சொந்தமான 2 ஏக்கர் நிலத்தில் விவசாயம் செய்து குடும்பத்தை நடத்தி வருகின்றனர்.

இவர்களது மகன்களான சிவக்குமார் 7-ம் வகுப்பு படிக்கும் போதும், செல்வம் 6-ம் வகுப்பு படிக்கும் போதும், நந்தகோபால் 5-ம் வகுப்பு படிக்கும் போதும் தசை சிதைவு நோயினால் பாதிக்கப்பட்டு நடக்க முடியாமல் வீட்டிலேயே உட்கார்ந்த நிலையில் வாழ்ந்து வருகிறார்கள்.

இவர்கள் 3 பேருக்கும் அரசு மூலம் மாற்றுத் திறனாளிகளுக்காக வழங்கப்படும் மாதம் தலா ரூ.1,500 வீதம் வழங்கப்பட்டு வருகிறது. இதுகுறித்து தகவல் அறிந்த கலெக்டர் கே.எஸ்.கந்தசாமி தசை சிதைவு நோயால் பாதிக்கப்பட்ட சகோதரர்கள் 3 பேருக்கும் சக்கர நாற்காலி வழங்கினார்.

அதைத்தொடந்து கலெக்டர் கந்தசாமி அந்த 3 பேரின் வீட்டிற்கு நேரில் சென்று அவர்கள் வசித்து வரும் பழைய வீட்டிற்கு பதிலாக அவர்களுக்கு சொந்தமான இடத்தில் புதிய வீடு கட்டுவதற்கான பணியை தொடங்கி வைத்தார். மேலும் அவர்களின் குடும்ப வருமானத்திற்காக 2 கறவை பசுக்கள் மற்றும் 2 கன்று குட்டிகளை வழங்கினார். இதுமட்டுமின்றி 3 சகோதரர்களுக்கும் தனித்தனியாக நீர் படுக்கையுடன் கூடிய புதிய கட்டிலும் வழங்கினார்.

மேலும் 3 சகோதரர்களும் வீட்டில் 3 சக்கர நாற்காலியில் உட்காந்து இருப்பதை உணர்ந்து, உடனடியாக மாற்றுத்திறனாளிகள் நலத்துறை மூலமாக வழங்கப்படும் பேட்டரியினால் இயக்கப்படும் சக்கர நாற்காலியை வரவழைத்து அவர்களுக்கு வழங்கினார்.

அப்போது மாவட்ட மாற்றுத்திறனாளிகள் நல அலுவலர் சரவணன் உள்பட அரசு அலுவலர்கள் உடனிருந்தனர்.