சேலத்தில் நடந்த குறைதீர்க்கும் நாள் கூட்டத்தில் கலெக்டர் முன்பு விவசாயி விஷம் குடித்ததால் பரபரப்பு

சேலம், 

சேலம் மாவட்ட கலெக்டர் அலுவலகத்தில் விவசாயிகள் குறைதீர்க்கும் நாள் கூட்டம் நேற்று நடந்தது. கலெக்டர் ராமன் தலைமை தாங்கி விவசாயிகளின் குறைகளை கேட்டறிந்து கோரிக்கை மனுக்களை பெற்றுக்கொண்டார். இதைத்தொடர்ந்து விவசாய சங்கங்களின் பிரதிநிதிகள் கலந்து கொண்டு பல்வேறு பிரச்சினைகள் தொடர்பாக பேசினர். அப்போது விவசாயிகள் கூறியதாவது:-

சேலம் மாவட்டத்தில் கடும் வறட்சி நிலவுகிறது. அதற்கு ஏரி, குளம், ஓடைகளில் உள்ள ஆக்கிரமிப்புகளே காரணம். எனவே, நீர் நிலைகளில் உள்ள ஆக்கிரமிப்புகளை அகற்ற உரிய நடவடிக்கை எடுக்க வேண்டும். மேட்டூர் அணையில் இருந்து வெளியேறும் உபரிநீரை மேட்டூர், எடப்பாடி, ஓமலூர், சங்ககிரி தொகுதிகள் மட்டுமின்றி மாவட்டம் முழுவதும் உள்ள ஏரி, குளங்களில் நிரப்பிடும் வகையில் அந்த திட்டத்தை மாற்றி அமைத்து செயல்படுத்த வேண்டும்.

ஆத்தூரில் வசிஷ்டநதியில் உள்ள ஆக்கிரமிப்புகளை அகற்ற வேண்டும். விவசாயிகளுக்கு மத்திய அரசு வழங்கும் ரூ.6 ஆயிரம் தொகையை அனைத்து விவசாயிகளுக்கும் பாரபட்சமின்றி வழங்க மாவட்ட நிர்வாகம் நடவடிக்கை எடுக்க வேண்டும். கடன் பிரச்சினையால் விவசாயிகள் மனஉளைச்சலில் தவித்து வருகிறார்கள். எனவே, தேசிய வங்கிகளில் பெறப்பட்ட நகை கடனுக்கு வட்டியை மட்டும் கட்டி திருப்பி வைக்கும் படி வங்கி மேலாளர்களுக்கு உத்தரவிட வேண்டும். முத்ரா திட்டத்தில் விவசாயிகளுக்கு சரிவர கடனுதவி வழங்குவது இல்லை. அதை முறைப்படுத்த வேண்டும்.

கெங்கவல்லி பகுதியில் உள்ள பொதுமக்கள், விவசாயிகள் பயன்பெறும் வகையில் புதிதாக உழவர் சந்தை ஏற்படுத்த வேண்டும். 2,400 ஏக்கர் பரப்பளவு கொண்ட பனமரத்துப்பட்டி ஏரியை தூர்வாரவும், ஆக்கிரமிப்புகளை அகற்றவும் உரிய நடவடிக்கை எடுக்க வேண்டும்.

இவ்வாறு அவர்கள் கூறினார்கள்.

இதைத்தொடர்ந்து கூட்டத்தில், சூரமங்கலம் பகுதியை சேர்ந்த விவசாயி மாதேஸ்வரன் என்பவரை பேசுவதற்காக அதிகாரிகள் அழைத்தனர். அப்போது, அவர் கலெக்டரிடம் ஒரு கோரிக்கை மனுவை அளித்தார். பின்னர் அவர் திடீரென தான் கையில் வைத்திருந்த விஷத்தை எடுத்து கலெக்டர் முன்பே குடித்து விட்டு, மயங்கி விழுந்தார். இதனால் அங்கு பரபரப்பு ஏற்பட்டது. பின்னர் அங்கிருந்தவர்கள் உடனடியாக விவசாயி மாதேஸ்வரனை மீட்டு சேலம் அரசு ஆஸ்பத்திரிக்கு அழைத்து சென்றனர். அங்கு அவருக்கு தீவிர சிகிச்சை அளிக்கப்பட்டு வருகிறது.

கலெக்டரிடம் அவர் கொடுத்த மனுவில், சிறு, குறு விவசாயிகளுக்காக உழவர்கள் உற்பத்தியாளர்கள் கம்பெனி என்ற குழுவை உருவாக்கினேன். அதில், ஏராளமான உறுப்பினர்கள் சேர்ந்தனர். உறுப்பினர்களுக்கு வங்கிகள் மூலம் கடனுதவி வழங்கப்பட்டது. ஆனால் கம்பெனியில் உள்ளவர்களில் சிலர், என்னை ஏமாற்றி பல லட்ச ரூபாய்களை மோசடி செய்துவிட்டார்கள். இதனால் தற்போது கடனாளியாக பரிதவித்து வருவதால், சம்பந்தப்பட்ட நபர்கள் மீது உரிய நடவடிக்கை எடுக்க வேண்டும், என்று கூறியிருந்தார்.

இது தொடர்பாக போலீசார் விசாரணை நடத்தியபோது, விவசாயி மாதேஸ்வரன் வாங்கிய கடனை திருப்பி செலுத்த முடியாமல் அவதிப்பட்டு வந்துள்ளார். இதுபற்றி பலமுறை அதிகாரிகளிடம் மனு கொடுத்தும் எவ்வித நடவடிக்கையும் எடுக்கவில்லை. இதனால் மனம் உடைந்த அவர் கலெக்டர் அலுவலகத்தில் நடந்த விவசாயிகள் குறைதீர்க்கும் நாள் கூட்டத்திற்கு வந்து விஷம் குடித்து தற்கொலைக்கு முயன்றது தெரியவந்தது. இது குறித்து போலீசார் விசாரணை நடத்தி வருகின்றனர்.