சாயல்குடி அருகே கொடுக்கல்- வாங்கல் தகராறில் மருமகன் வெட்டிக்கொலை; மாமனார் கைது

சாயல்குடி,

ராமநாதபுரம் மாவட்டம், சாயல்குடி சுயம்புலிங்கபுரம் பகுதியைச் சேர்ந்தவர் சிவலிங்கம் (வயது 80). விவசாயி. இவர் தனது மகள் மீனாட்சியை முனீசுவரன்(34) என்பவருக்கு திருமணம் செய்து கொடுத்துள்ளார். முனீசுவரன் நுங்கு வியாபாரம் செய்து வந்தார். சிவலிங்கத்துக்கும், அவரது மருமகன் முனீசுவரனுக்கும் இடையே கொடுக்கல்- வாங்கல் தகராறு இருந்துள்ளது. இது தொடர்பாக அவர்களிடையே நேற்று வாக்குவாதம் ஏற்பட்டுள்ளது. வாக்குவாதம் முற்றியதில் ஆத்திரம் அடைந்த சிவலிங்கம், தான் கையில் வைத்திருந்த அரிவாளால் முனீசுவரனை வெட்டியுள்ளார். இதில் அவர் சம்பவ இடத்திலேயே ரத்த வெள்ளத்தில் பலியானார்.

இதுகுறித்து முனீசுவரனின் மனைவி மீனாட்சி சாயல்குடி போலீசில் புகார் செய்தார். அதன்பேரில் போலீஸ் இன்ஸ்பெக்டர் கனகாபாய் மற்றும் போலீசார் அங்கு விரைந்து சென்று பிணத்தை கைப்பற்றி பிரேத பரிசோதனைக்காக கடலாடி அரசு ஆஸ்பத்திரிக்கு அனுப்பி வைத்தனர்.

மேலும் இது தொடர்பாக சாயல்குடி போலீசார் வழக்கு பதிந்து சிவலிங்கத்தை கைது செய்து விசாரித்து வருகின்றனர்.