ராசிபுரம் அருகே வெவ்வேறு விபத்துகளில் 2 டிரைவர்கள் சாவு

ராசிபுரம், 

நாமக்கல் மாவட்டம் ராசிபுரம் அருகேயுள்ள அணைப்பாளையத்தை சேர்ந்தவர் கந்தசாமி. இவரது மகன் ராஜதுரை (வயது 28). கார் டிரைவர். இவருடைய மனைவி பவானி (25). இவர்களுக்கு சஷ்மிதா(2) என்ற பெண் குழந்தை உள்ளது. நேற்று முன்தினம் இரவு ராஜதுரை ஆண்டகளூர் கேட்டில் இருந்து வீட்டுக்கு பஸ்சில் சென்றார். சேலம்-நாமக்கல் தேசிய நெடுஞ்சாலையில் உள்ள பழைய மோட்டார் வாகன ஆய்வாளர் அலுவலகம் அருகில் பஸ்சில் இருந்து இறங்கி புதிய பைபாஸ் சாலையில் நடந்து சென்றார்.

அப்போது பின்னால் வந்த அடையாளம் தெரியாத வாகனம் ராஜதுரை மீது மோதியது. இதில் பலத்த காயம் அடைந்த அவரை அக்கம் பக்கத்தினர் மீட்டு ராசிபுரம் அரசு ஆஸ்பத்திரியில் சேர்த்தனர். பின்னர் அவரை மேல் சிகிச்சைக்காக சேலம் சீலநாயக்கன்பட்டியில் உள்ள தனியார் ஆஸ்பத்திரிக்கு கொண்டு சென்றனர். ஆனால் வழியிலேயே ராஜதுரை பரிதாபமாக இறந்தார். இதுகுறித்து தகவல் அறிந்ததும் ராசிபுரம் போலீசார் விரைந்து சென்று ராஜதுரையின் உடலை கைப்பற்றி பிரேத பரிசோதனைக்காக ராசிபுரம் அரசு ஆஸ்பத்திரிக்கு அனுப்பி வைத்தனர். விபத்து தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.

புதுச்சத்திரம் ஒன்றியம் கருங்கல்பாளையத்தை சேர்ந்தவர் முத்துசாமி. இவரது மகன் ரங்கசாமி (45). லாரி டிரைவர். இவர் நேற்று முன்தினம் இரவு போடிநாயக்கன்பட்டியில் உள்ள மாமனார் வீட்டுக்கு மோட்டார் சைக்கிளில் சென்றார். ராசிபுரம்-சிங்களாந்தபுரம் சாலையில் போடிநாயக்கன்பட்டி அருகேயுள்ள ஒரு தனியார் திருமண மண்டபம் பகுதியில் சென்றபோது சாலையின் ஓரத்தில் இருந்த குழாயின் மீது மோட்டார் சைக்கிள் மோதியது.

இதில் நிலை தடுமாறி கீழே விழுந்து பலத்த காயம் அடைந்த ரங்கசாமி சம்பவ இடத்திலேயே பரிதாபமாக இறந்தார். இந்த விபத்து குறித்து பேளுக்குறிச்சி போலீசார் வழக்குப்பதிவு செய்து விசாரணை நடத்தி வருகின்றனர். விபத்தில் இறந்த ரங்கசாமியின் உடல் பிரேத பரிசோதனை ராசிபுரம் அரசு ஆஸ்பத்திரியில் நடந்தது. விபத்தில் இறந்த ரங்கசாமிக்கு சத்தியகலா என்ற மனைவியும், ஜெயசூர்யா, கண்ணன் என்ற 2 மகன்களும், ஜோதிகா என்ற மகளும் உள்ளனர்.