பரமக்குடி பகுதியில் குடிமராமத்து பணி: கண்மாய்களில் மணல் கொள்ளை

பரமக்குடி பகுதியில் உள்ள விவசாயிகள் ஆடி மாதம் பிறந்தது முதல் பல்வேறு கிராமங்களில் விவசாய பணிகளை மேற்கொண்டு வருகின்றனர். விவசாய நிலங்களை உழுது விதைப்பதற்காக மழையை எதிர்பார்த்து காத்திருக்கின்றனர். ஆனால் பருவமழை பெய்யாததால் விவசாயிகள் கவலை அடைந்துள்ளனர். அவ்வாறு மழை பெய்தாலும் மழை நீரை பாதுகாப்பாக சேமித்து விவசாய பணிகளை மேற்கொள்வதற்காக உள்ள கண்மாய்கள், ஊருணிகள், கால்வாய்கள் முறையாக தூர்வாரப்படாமல் அவைகளில் காட்டுகருவேல மரங்கள், செடிகள் வளர்ந்து புதர் மண்டி கிடக்கின்றன. பல கண்மாய்கள் ஆக்கிரமிப்பாளர்கள் பிடியில் சிக்கி காணாமல் போகும் நிலை உருவாகிஉள்ளது. இதில் பரமக்குடி ஒன்றியத்தில் 64 கண்மாய்கள், முதுகுளத்தூர் ஒன்றியத்தில் 32 கண்மாய்கள், நயினார்கோவில் ஒன்றியத்தில் 58 கண்மாய்கள் என பொதுப்பணித் துறை கண்மாய்கள் உள்ளன. இதில் பல கண்மாய்களின் நிலையும் அதே தான்.