வெள்ளோடு அருகே கணவர் இறந்த துயரத்தால் விஷம் குடித்து பெண் தற்கொலை

சென்னிமலை,

வெள்ளோடு அருகே உள்ள வள்ளிபுரத்தான்பாளையம் அழகர்புரத்தை சேர்ந்தவர் சவுந்தர்ராஜன். இவர் கடந்த 3 ஆண்டுகளுக்கு முன்பு இறந்துவிட்டார். அவருடைய மனைவி மல்லிகா (வயது 58). இவர்களுடைய மகன் கார்த்திக்(39). மல்லிகா தனது மகன் குடும்பத்துடன் வசித்து வந்தார்.

கணவர் இறந்த நாளில் இருந்து மல்லிகா மனவேதனையுடன் இருந்து வந்தார். மேலும் அவர் உடல்நலக்குறைவால் அவதிப்பட்டு வந்துள்ளார்.

இந்தநிலையில் கணவர் இறந்த துக்கம் தாங்க முடியாமல் இருந்த மல்லிகா ‘இனி வாழ்வதை விட சாவதே மேல்’ என்ற முடிவுக்கு வந்தார். இதனால் விஷத்தை எடுத்து குடித்துவிட்டு வீட்டில் மயங்கி கிடந்தார்.

இதைப்பார்த்த கார்த்திக் அதிர்ச்சி அடைந்தார். உடனே அக்கம்பக்கத்தினர் உதவியுடன் மல்லிகாவை மீட்டு சிகிச்சைக்காக ஈரோட்டில் உள்ள ஒரு தனியார் மருத்துவமனையில் சேர்த்தார். பின்னர் மேல்சிகிச்சைக்காக கோவையில் உள்ள ஒரு தனியார் மருத்துவமனைக்கு கொண்டு செல்லப்பட்டார். அங்கு அவருக்கு டாக்டர்கள் தீவிர சிகிச்சை அளித்தார்கள். ஆனால் சிகிச்சை பலனின்றி மல்லிகா நேற்று முன்தினம் இறந்தார்.

இதுகுறித்து வெள்ளோடு போலீசார் வழக்குப்பதிவு செய்து விசாரணை நடத்தி வருகிறார்கள்.