<
களக்காடு அருகே, விவசாயிக்கு அரிவாள் வெட்டு
களக்காடு அருகே விவசாயிக்கு அரிவாள் வெட்டு விழுந்தது. இதுதொடர்பாக 2 பேரை போலீசார் வலைவீசி தேடி வருகின்றனர்.
களக்காடு,
களக்காடு அருகே உள்ள மஞ்சுவிளையை சேர்ந்தவர் காமராஜ் (வயது 51) விவசாயி. இவருக்கு சொந்தமான வயல் அருகே அதே ஊரைச் சேர்ந்த சாமுவேல் மகன் ஸ்டீபன் என்பவருக்கு சொந்தமான வயலும் உள்ளது.
இந்த நிலையில் நேற்று முன்தினம் ஸ்டீபன் தனது வயலுக்கு காமராஜிக்கு சொந்தமான வயலின் வழியாக குழாய் போட்டு தண்ணீர் பாய்ச்சினார். குழாயில் துவாரங்கள் இருந்ததால் தண்ணீர் கசிவு ஏற்பட்டு காமராஜ் வயலில் இருந்த பயிர்கள் சேதம் அடைந்தன. எனவே காமராஜ் மோட்டாரை அணைப்பதற்கு ஸ்டீபனை தேடினார். அவர் இல்லாததால் காமராஜே சென்று மோட்டாரை அணைத்தார்.
இதையடுத்து ஸ்டீபனும், அவரது உறவினர் ஜெபஸ்டீனும் சேர்ந்து காமராஜிடம் சென்று தகராறு செய்தனர். தகராறு முற்றியதால் ஆத்திரம் அடைந்த ஸ்டீபன், ஜெபஸ்டீன் ஆகியோர் சேர்ந்து காமராஜை அரிவாளால் வெட்டி, கம்பால் தாக்கினர்.
இதில் அவர் படுகாயம் அடைந்தார். அவரை அக்கம்பக்கத்தினர் மீட்டு சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரியில் சேர்த்தனர். இதுகுறித்த புகாரின் பேரில் களக்காடு போலீசார் வழக்குப்பதிவு செய்து ஸ்டீபன், ஜெபஸ்டீன் ஆகியோரை வலைவீசி தேடி வருகின்றனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
