மருத்துவ காப்பீட்டு திட்டம் அனைவருக்கும் அமல்படுத்தப்படும் - சட்டசபையில் நாராயணசாமி உறுதி

புதுச்சேரி,

புதுவை சட்டசபையில் பட்ஜெட் உரை மீதான விவாதத்துக்கு பதில் அளித்து முதல்-அமைச்சர் நாராயணசாமி பேசினார்.

என்.ஆர்.காங்கிரஸ் எம்.எல்.ஏ. டி.பி.ஆர்.செல்வம் எழுப்பிய கேள்வியை தொடர்ந்து நடந்த விவாதம் வருமாறு:-

டி.பி.ஆர்.செல்வம்: மத்திய அரசு அறிவித்த ஆயுஷ்மான் பாரத் மருத்துவ காப்பீட்டு திட்டத்தில் புதுவை மாநிலத்தில் எத்தனை நோயாளிகள் இதுவரை பயன் அடைந்துள்ளார்கள்?

முதல்-அமைச்சர் நாராயணசாமி: இந்த திட்டம் கடந்த 31-ந்தேதி தொடங்கப்பட்டது. இத்திட்டத்தின்கீழ் புதுவை மாநிலத்தில் இதுவரை 1.03 லட்சம் பயனாளி குடும்பங்கள் (2.68 லட்சம் நபர்கள்) தேர்வு செய்யப்பட்டுள்ளனர். 2-வது கட்டமாக அனைவருக்கும் இந்த திட்டம் அமல்படுத்தப்படும்.

டி.பி.ஆர்.செல்வம்: மத்திய அரசு இந்த திட்டத்தை எந்த வருடம் கொண்டு வந்தது?

நாராயணசாமி: மத்திய அரசு 2018-ம் ஆண்டு கொண்டு வந்தது. பல்வேறு நிலைகளில் மத்திய அரசு ஒப்புதலுக்கு காலதாமதமானது.

டி.பி.ஆர்.செல்வம்: 38 ஆயிரம் குடும்பங்கள்தான் இதில் இணைக்கப்பட்டுள்ளதாக கூறப்படுகிறதே?

அன்பழகன்: புதுவை மக்கள் அனைவருக்கும் முழுமையாக செயல்படுத்தினாலே இந்த திட்டத்துக்கு ரூ.4½ கோடிதான் வரும்.

சிவா (தி.மு.க.): மாகி, ஏனாமில் எல்லாம் இன்சூரன்சு திட்டம் உள்ளது. புதுவை மக்கள் என்ன பாவம் செய்தனர்?

நாராயணசாமி: அனைவருக்கும் இத்திட்டத்தை அமல்படுத்துகிறோம்.

தீப்பாய்ந்தான் (காங்): இது அரசு திட்டமா? இல்லை பாரதீய ஜனதாவின் திட்டமா? இதற்காக பாரதீய ஜனதா நிர்வாகிகள் சிலர் விண்ணப்பம் கொடுத்து வருகின்றனர்.

அனந்தராமன் (காங்): இதைக்காட்டிதான் பாரதீய ஜனதா கட்சிக்கு உறுப்பினர் சேர்க்கையே நடக்கிறது.

நாராயணசாமி: இது தனி நபர் திட்டம் அல்ல. இதற்கு அரசியல் சாயம் பூசக்கூடாது. இதற்கு மாநில அரசின் பங்களிப்பு 40 சதவீதம் உள்ளது.

அன்பழகன் (அ.தி.மு.க.): எம்.எல்.ஏ.க்களுக்கு தெரியாமல் காங்கிரஸ் நிர்வாகிகள் பலர் எதிர்க்கட்சி தொகுதிகளில் சில திட்டங்களுக்கு விண்ணப்பம் கொடுக்கிறார்களே? அதை எப்படி எடுத்துக்கொள்வது?

(அன்பழகன் எம்.எல்.ஏ.வுக்கு ஆதரவாக என்.ஆர்.காங்கிரஸ், பாரதீய ஜனதா எம்.எல்.ஏ.க்களும் எழுந்து பேசினார்கள். அவர்களை சபாநாயகர் சிவக்கொழுந்து அமைதிப்படுத்தினார்.)

அமைச்சர் மல்லாடிகிருஷ்ணாராவ்: இந்த திட்டத்தின்கீழ் ஒருவருக்கு ரூ.434 பிரிமீயமாக செலுத்தப்படுகிறது. நான் முன்பு மத்திய சுகாதாரத்துறை மந்திரியை சந்தித்தபோது புதுவை மாநிலத்தில் உள்ள ஒட்டுமொத்த மக்களுக்கும் இந்த திட்டத்தை செயல்படுத்துவதாக கூறினார். இதை தொடர்ந்து வலியுறுத்துவோம்.

இவ்வாறு விவாதம் நடந்தது.