பெண் உள்பட 6 பேரை தாக்கிய வழக்கு: 7 பேருக்கு ஜெயில் தண்டனை - தென்காசி கோர்ட்டு தீர்ப்பு

தென்காசி,

தென்காசி அருகே கீழஇலஞ்சி கிராமத்தில் உள்ள காளியம்மன் கோவிலில் சாமி கும்பிடுவதில் சுகுமார் பிரிவினருக்கும், அதே பகுதியை சேர்ந்த ரஞ்சித்குமார் (வயது 36) பிரிவினருக்கும் இடையே முன்விரோதம் இருந்து வந்துள்ளது. இந்தநிலையில் கடந்த 1-10-2008 அன்று இரவு அங்குள்ள காளியம்மன் கோவில் அருகே சுகுமார், செல்வகுமார், இசக்கி, ராமசாமி, மற்றொரு இசக்கி மற்றும் ஒரு பெண் ஆகிய 6 பேரும் நின்று பேசிக் கொண்டிருந்துள்ளனர்.

அப்போது அங்கு வந்த ரஞ்சித்குமார், காந்தி என்ற முத்துக்குமாரசாமி (43), மீனாகுமார் (47), ரவி (36), துரைபாண்டி (58), மூக்கையா (49), செல்லத்துரை (45) ஆகியோர், சுகுமார் தரப்பினரிடம் தகராறு செய்துள்ளனர். மேலும் அவர்கள் 6 பேரையும் அரிவாள், கம்பு உள்ளிட்ட ஆயுதங்களால் தாக்கி, கொலை மிரட்டலும் விடுத்தனர்.

இதுபற்றி குற்றாலம் போலீசில் புகார் செய்யப்பட்டது. அதன் பேரில் ரஞ்சித்குமார் உள்பட 7 பேர் மீதும் போலீசார் வழக்குப்பதிவு செய்து, தென்காசி கோர்ட்டில் வழக்கு தொடர்ந்தனர். இந்த வழக்கு விசாரணைக்கு வந்தது.

நீதிபதி காமராஜ் விசாரித்து, ரஞ்சித்குமாருக்கு 5 ஆண்டுகள், 7 மாதம் ஜெயில் தண்டனையும், ரூ.1,500 அபராதமும், முத்துக்குமாரசாமிக்கு 4 ஆண்டுகள், 7 மாதம் ஜெயில் தண்டனையும், ரூ.1000 அபராதமும் விதித்து தீர்ப்பளித்தார்.

இதே போல் மீனாகுமார், ரவி, துரைபாண்டி, மூக்கையா, செல்லத்துரை ஆகியோருக்கு ஒரு ஆண்டு, 8 மாதம் சிறை தண்டனையும் விதித்து நீதிபதி தீர்ப்பளித்தார். இந்த வழக்கில் அரசு தரப்பில் வக்கீல் ராமச்சந்திரன் ஆஜரானார்.