ஊட்டியில், படகு இல்ல சாலையில் உலா வந்த காட்டெருமைகள் - பொதுமக்கள் பீதி

ஊட்டி,

சுற்றுலா நகரமாக ஊட்டி திகழ்ந்து வருகிறது. ஊட்டி ஏரியில் சுற்றுலா வளர்ச்சிக் கழகம் சார்பில் படகு இல்லம் செயல்பட்டு வருகிறது. இந்த ஏரியை சுற்றி தீட்டுக்கல், கேர்ன்ஹில் உள்ளிட்ட அடர்ந்த வனப்பகுதிகள் உள்ளன. அங்கு காட்டெருமை, சிறுத்தைப்புலி, கடமான் உள்ளிட்ட வனவிலங்குகள் வாழ்ந்து வருகின்றன. இதற்கிடையே காட்டெருமைகள் வனப்பகுதிகளில் இருந்து நகருக்குள் வருவது அதிகரித்து உள்ளது. இதனால் பொதுமக்கள் மற்றும் வாகன ஓட்டிகள் அச்சம் அடைந்து உள்ளனர்.

இந்த நிலையில் கடந்த சில நாட்களாக தினமும் காலையில் ஊட்டி படகு இல்ல சாலையில் காட்டெருமைகள் கூட்டம், கூட்டமாக உலா வருகின்றன. நேற்று காலையில் ரெயில்வே மேம்பாலத்தின் கீழ்பகுதியில் காட்டெருமைகள் அங்கும், இங்குமாக உலா வந்தது. காட்டெருமைகள் சாலையின் குறுக்கே நின்றதால், அந்த வழியாக சென்ற இருசக்கர மற்றும் நான்கு சக்கர வாகன ஓட்டிகள் அவதி அடைந்தனர். ஊட்டியில் இருந்து காந்தலுக்கு இயக்கப்படும் அரசு பஸ் செல்வதில் சிக்கல் ஏற்பட்டது. பின்னர் காட்டெருமைகள் சாலை வழியாக வனப்பகுதியை நோக்கி சென்றன.

இதுகுறித்து பொதுமக்கள் கூறும்போது, சமீபகாலமாக காட்டெருமைகள் நகருக்குள் வருவது வழக்கமாகி விட்டது. இதனால் பொதுமக்கள் பீதியில் உள்ளனர். எனவே, வனத்துறையினர் வனவிலங்குகள் நகருக்குள் வருவதை தடுக்க நடவடிக்கை எடுக்க வேண்டும் என்றனர்.