வாழப்பாடியில், மொபட் மீது பஸ் மோதல்: விவசாயி உள்பட 2 பேர் பலி

வாழப்பாடி, 

சேலம் மாவட்டம் வாழப்பாடி அருகே உள்ள காட்டுவேப்பிலைப்பட்டி ஊராட்சி கவர்கல்பட்டி கிராமத்தை சேர்ந்தவர் பழனிசாமி(வயது 65), விவசாயி. இவருடைய பேரனுக்கு கடந்த வாரம் பேளூர் தான்தோன்றீஸ்வரன் கோவிலில் திருமணம் நடைபெற்றது. இந்த திருமணத்திற்கான பதிவுச்சான்றிதழை பெறுவதற்காக பழனிசாமி அதே பகுதியை சேர்ந்த கணேசன்(56) என்பவருடன் மொபட்டில் சென்றார்.

பின்னர் அவர்கள் கோவிலுக்கு சென்று பதிவுச்சான்றிதழை பெற்றுவிட்டு மொபட்டில் மீண்டும் ஊருக்கு புறப்பட்டனர். இவர்கள் வாழப்பாடியில் பேளூர் பிரிவு ரோடு அருகே சென்று கொண்டிருந்தனர். அப்போது கள்ளக்குறிச்சியில் இருந்து சேலம் நோக்கி வேகமாக வந்த தனியார் பஸ் அவர்களுடைய மொபட் மீது மோதியது.

இதில் கணேசன் தலைநசுங்கி சம்பவ இடத்திலேயே பரிதாபமாக இறந்தார். மேலும் படுகாயம் அடைந்த பழனிசாமியை அந்த வழியாக வந்தவர்கள் மீட்டு சிகிச்சைக்காக சேலம் அரசு ஆஸ்பத்திரிக்கு அனுப்பி வைத்தனர். அங்கு சிகிச்சை பலனின்றி அவர் பரிதாபமாக இறந்தார்.

இந்த விபத்து குறித்து வாழப்பாடி போலீஸ் இன்ஸ்பெக்டர் சுப்பிரமணி மற்றும் போலீசார் வழக்குப்பதிவு செய்து விசாரணை நடத்தி வருகின்றனர்.