உளுந்தூர்பேட்டை அருகே தனித்தனி விபத்தில் தாத்தா, பேத்தி உள்பட 3 பேர் பலி

உளுந்தூர்பேட்டை, 

விழுப்புரம் மாவட்டம் உளுந்தூர்பேட்டை அருகே எம்.எஸ்.தர்கா பகுதியை சேர்ந்தவர் முகமதுஅலி (வயது 46). கூலித்தொழிலாளி. இவர், நேற்று தனது மனைவி பாத்திமாபீவி, பேத்தி ரீபா(2) ஆகியோரை அழைத்து கொண்டு அருகில் உள்ள ஒலையனூருக்கு மோட்டார் சைக்கிளில் சென்றார். பின்னர் அங்கிருந்து அதே மோட்டார் சைக்கிளில் வீட்டிற்கு 3 பேரும் புறப்பட்டனர். காலை 8.30 மணி அளவில் ஒலையனூர் பஸ் நிறுத்தம் அருகே சென்றபோது அந்த வழியாக வந்த கார் ஒன்று அவர்கள் சென்ற மோட்டார் சைக்கிள் மீது மோதியது. இந்த விபத்தில் படுகாயம் அடைந்த முகமதுஅலி சம்பவ இடத்திலேயே பரிதாபமாக இறந்தார். பாத்திமாபீவி, ரீபா ஆகியோர் பலத்த காயம் அடைந்தனர். இதைபார்த்த அக்கம் பக்கத்தினர், காயம் அடைந்த 2 பேரையும் மீட்டு சிகிச்சைக்காக உளுந்தூர்பேட்டை அரசு மருத்துவமனையில் சேர்த்தனர். அங்கு அவர்களுக்கு டாக்டர்கள் தீவிர சிகிச்சை அளித்தனர். இருப்பினும் சிகிச்சை பலனின்றி குழந்தை ரீபா பரிதாபமாக இறந்தது.

இதனிடையே மேல்சிகிச்சைக்காக பாத்திமாபீவி முண்டியம்பாக்கம் அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்து வருகின்றனர். இது குறித்த புகாரின் பேரில் உளுந்தூர்பேட்டை போலீஸ் இன்ஸ்பெக்டர் எழிலரசி வழக்குப்பதிவு செய்து விசாரணை நடத்தி வருகின்றார்.

சென்னை கொளத்தூரை சேர்ந்தவர் ரவி மகன் சதீஷ் (36), இவரும், சென்னை வில்லிவாக்கத்தை சேர்ந்த ஸ்ரீநாத் (26), கலையரசன் (32) ஆகியோரும் நண்பர்கள். இவர்கள் 3 பேரும் சேலத்தில் உள்ள ஒரு கோவிலுக்கு செல்வதற் காக காரில் புறப்பட்டு சென்றனர். காரை சதீஷ் ஓட்டினார். நேற்று காலை 6.00 மணி அளவில் உளுந்தூர்பேட்டை-சேலம் தேசிய நெடுஞ்சாலையில் உள்ள எலவனாசூர்கோட்டை புறவழிச்சாலையில் சென்றபோது எதிரே வந்த டேங்கர் லாரி ஒன்று சதீஷ் உள்ளிட்டோர் சென்ற கார் மீது எதிர்பாராதவிதமாக மோதியது.

இதில் காரின் முன் பக்கம் பலத்த சேதமடைந்தது. இந்த விபத்தில் பலத்த காயம் அடைந்த சதீஷ் சம்பவ இடத்திலேயே பரிதாபமாக இறந்தார். ஸ்ரீநாத், கலையரசன் ஆகியோர் பலத்த காயம் அடைந்தனர். அவர்களை அக்கம் பக்கத்தினர் மீட்டு சிகிச்சைக்காக உளுந்தூர்பேட்டை அரசு மருத்துவமனைக்கு அனுப்பி வைத்தனர். அங்கு அவர்களுக்கு டாக்டர்கள் தீவிர சிகிச்சை அளித்து வருகின்றனர்.

இதனிடைய விபத்து குறித்த தகவலின் பேரில் சம்பவ இடத்துக்கு எலவனாசூர்கோட்டை போலீசார் விரைந்து சென்று விசாரணை நடத்தினர்.

பின்னர் விபத்தில் இறந்த சதீசின் உடலை கைப்பற்றி பிரேத பரிசோதனைக்காக உளுந்தூர்பேட்டை அரசு மருத்துவமனைக்கு அனுப்பி வைத்தனர். தொடர்ந்து விபத்து குறித்த புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.