எஸ்.புதூர் அருகே திருமணமான 15 நாளில் இளம்பெண் தூக்குப்போட்டு தற்கொலை; உருக்கமான கடிதம் சிக்கியது

எஸ்.புதூர்,

சிங்கம்புணரி வட்டம் எஸ்.புதூர் அருகே உள்ள கணபதிபட்டியை சேர்ந்தவர் விவசாயி தங்கையா. இவரது மனைவி பழனியம்மாள். இவர்களின் மூத்த மகள் மலர் (வயது 25). இவருக்கும், புதுக்கோட்டை மாவட்டம் பொன்னமராவதி அருகே உள்ள கல்லம்பட்டியை சேர்ந்த வெள்ளைச்சாமி மகன் சுப்பிரமணியனுக்கும் (28) கடந்த 15 நாட்களுக்கு முன்பு திருமணம் நடைபெற்றது.

இந்தநிலையில் கணவன்-மனைவிக்கிடையே கருத்து வேறுபாடு ஏற்பட்டதின் காரணமாக அவர்களுக்குள் தகராறு ஏற்பட்டது. மேலும் கணவர், மலரின் நிறத்தை அடிக்கடி குற்றம் கூறி வந்தாராம். கணவரின் இந்த வார்த்தைகளால் மன உளைச்சல் அடைந்த மலர் இதுகுறித்து தனது தந்தையிடம் கூறி, தன்னை அழைத்து செல்லும்படி கேட்டு அழுதுள்ளார்.

இதையடுத்து தங்கையா தனது மகளை கணபதிபட்டிக்கு அழைத்து வந்துவிட்டார். தொடர்ந்து மலர், தனது தந்தையிடம் கணவர் கூறிய வார்த்தைகளை கூறி தனது வாழ்க்கை இப்படி ஆகிவிட்டதே என்று புலம்பி உள்ளார். இந்தநிலையில் நேற்று முன்தினம் தங்கையா தனது உறவினர் வீட்டு துக்க நிகழ்ச்சிக்கு சென்று விட்டு வீடு திரும்பினார்.

அப்போது வீட்டின் கதவு உள் பக்கமாக பூட்டப்பட்டிருப்பதை கண்டு தட்டினார். வெகுநேரம் ஆகியும் கதவு திறக்கப்படாததால், வீட்டின் பின்புறம் உள்ள ஜன்னல் வழியாக சென்று பார்த்தார். அப்போது மலர் சேலையில் தூக்குப்போட்டு தற்கொலை செய்து கொண்டதை கண்டு கதறினார்.

அவரது சத்தத்தை கேட்டு வந்த அக்கம்பக்கத்தினர் வீட்டின் கதவை உடைத்து, மலரை தூக்கில் இருந்து கீழே இறக்கினர். மேலும் இதுகுறித்து புழுதிபட்டி போலீசாருக்கு தகவல் தெரிவிக்கப்பட்டது. அதைத்தொடர்ந்து அங்கு வந்த போலீசார் மலரின் உடலை மீட்டு சிங்கம்புணரி அரசு மருத்துவமனைக்கு அனுப்பி வைத்தனர். மேலும் மலர் இறப்பதற்கு முன்பு 13 பக்கத்திற்கு தனது நிலை குறித்து உருக்கமாக கடிதம் எழுதி வைத்திருந்ததை போலீசார் கைப்பற்றினர். தொடர்ந்து இதுகுறித்து வழக்கு பதிவு செய்து விசாரித்து வருகின்றனர்.

திருமணமான 15 நாட்களில் இளம்பெண் தூக்குப்போட்டு தற்கொலை செய்துள்ளதால், தேவகோட்டை வருவாய் கோட்டாட்சியர் சங்கர நாராயணன் மேல் விசாரணை நடத்தி வருகின்றனர். இந்த சம்பவம் கணபதிபட்டியில் பெரும் சோகத்தை ஏற்படுத்தி உள்ளது.