மராட்டிய சட்டசபை தேர்தலில் மீண்டும் ஒரு தமிழ் எம்.எல்.ஏ. தேர்வாவது உறுதியாகி விட்டது - தமிழர்கள் மகிழ்ச்சி

மும்பை, 

மராட்டிய தலைநகர் மும்பையில் 20 லட்சத்துக்கும் அதிகமான தமிழர்கள் வசித்து வருகின்றனர். ஆனால் இங்கு இருந்து தமிழர் ஒருவர் மராட்டிய சட்டசபைக்கு தேர்வாவது குதிரை கொம்பாகவே இருந்தது. கடந்த 35 ஆண்டுகளுக்கு முன் சுப்ரமணியம் என்பவர் மாட்டுங்கா தொகுதியில் காங்கிரஸ் சார்பில் போட்டியிட்டு எம்.எல்.ஏ. ஆனார்.

அதன் பிறகு கேப்டன் தமிழ்ச்செல்வன் கடந்த 2014-ம் ஆண்டு தேர்தலில் பா.ஜனதா சார்பில் சயான் கோலிவாடா தொகுதியில் போட்டியிட்டு எம்.எல்.ஏ. ஆனார்.

இந்த நிலையில் மராட்டிய சட்டசபைக்கு வருகிற 21-ந் தேதி தேர்தல் நடைபெற உள்ளது.

இந்த தேர்தலில் போட்டியிடும் முதல் வேட்பாளர் பட்டியலை பா.ஜனதா நேற்று வெளியிட்டது. அந்த கட்சி சயான் கோலிவாடா தொகுதியில் போட்டியிட மீண்டும் கேப்டன் தமிழ்ச்செல்வன் எம்.எல்.ஏ.வுக்கு வாய்ப்பு வழங்கி உள்ளது. கேப்டன் தமிழ்ச்செல்வன் எம்.எல்.ஏ. ஆவதற்கு முன் சயான்கோலிவாடா பகுதியில் கவுன்சிலராக இருந்தவர் ஆவார். இவர் புதுக்கோட்டை மாவட்டம் கறம்பக்கோட்டை அருகே உள்ள பிலாவிடுதி என்ற கிராமத்தை சேர்ந்தவர்.

இதேபோல காங்கிரஸ் கட்சி தனது முதல் வேட்பாளர் பட்டியலை கடந்த ஞாயிற்றுக்கிழமை வெளியிட்டது. அதில் சயான் கோலிவாடா தொகுதியில் தமிழர் கணேஷ்குமார் போட்டியிட அக்கட்சி வாய்ப்பு வழங்கி உள்ளது. இவரது சொந்த ஊர் நெல்லை மாவட்டத்தில் உள்ள வள்ளியூர் ஆகும்.

கணேஷ்குமார் கல்லூரி படிக்கும் காலத்தில் இருந்தே காங்கிரசில் இணைந்து பணியாற்றி வருகிறார். மேலும் இளைஞர் காங்கிரசில் தேசிய அளவில் பொறுப்புகளை வகித்து வந்தவர் ஆவார். தற்போது இவர் மும்பை இளைஞர் காங்கிரஸ் தலைவராக உள்ளார். கணேஷ்குமார் மாட்டுங்காவில் உள்ள பிரபல அரோரா தியேட்டரின் உரிமையாளர் நம்பிராஜனின் மகன் ஆவார்.

சயான் கோலிவாடாவில் பா.ஜனதா, காங்கிரஸ் என பிரதான கட்சிகள் சார்பில் 2 தமிழர்கள் போட்டியிடுகிறார்கள்.

பா.ஜனதா வேட்பாளருக்கு கூட்டணி கட்சியான சிவசேனாவும், காங்கிரஸ் வேட்பாளருக்கு கூட்டணி கட்சியான தேசியவாத காங்கிரசும் ஆதரவு தெரிவிக்க உள்ளது. மற்றபடி முக்கிய கட்சிகள் எதுவும் இல்லாததால், இந்த தேர்தலிலும் சயான் கோலிவாடா தொகுதியில் 2 தமிழ் வேட்பாளர்களுக்கு இடையே நேரடி போட்டி நிலவும் சூழல் ஏற்பட்டு உள்ளது. எனவே மராட்டிய சட்டசபைக்கு மீண்டும் தமிழ் எம்.எல்.ஏ. ஒருவர் தேர்ந்தெடுக்கப்படுவது உறுதியாகி உள்ளது. இது தமிழர்கள் மத்தியில் மகிழ்ச்சியை ஏற்படுத்தி உள்ளது.