<
தூசி அருகே, மோட்டார் சைக்கிள் மீது வேன் மோதல்; புதுமாப்பிள்ளை பலி - நண்பர் படுகாயம்
தூசி அருகே மோட்டார் சைக்கிள் மீது வேன் மோதியதில் புதுமாப்பிள்ளை பரிதாபமாக உயிரிழந்தார். அவருடைய நண்பர் படுகாயம் அடைந்தார்.
தூசி,
கீழ்பென்னாத்தூர் தாலுகா வேடந்தவாடி கிராமத்தை சேர்ந்தவர் ஏழுமலை. அவருடைய மகன் அன்பரசன் (வயது 20). இவருடைய மனைவி அனுசியா. இருவருக்கும் கடந்த 6 மாதங்களுக்கு முன்பு திருமணம் நடைபெற்றது.
அதே பகுதியை சேர்ந்தவர் பூவரசன் (23). இவரும், அன்பரசனும் நண்பர்கள். இவர்கள் 2 பேரும் ஸ்ரீபெரும்புதூரில் உள்ள ஒரு தனியார் தொழிற்சாலையில் வேலை பார்த்து வந்தனர்.
இந்த நிலையில் நேற்று முன்தினம் வேலை முடிந்து இருவரும் மோட்டார் சைக்கிளில் வீட்டுக்கு வந்து கொண்டிருந்தனர். மோட்டார் சைக்கிளை அன்பரசன் ஓட்டினார்.
தூசி அருகே உள்ள வெள்ளாமலை கிராமம் மெயின் ரோட்டில் இரவு 10.30 மணி அளவில் வந்த போது, எதிரே வந்த வேன் திடீரென மோட்டார் சைக்கிள் மீது மோதியது. இந்த விபத்தில் அன்பரசன் சம்பவ இடத்திலேயே பரிதாபமாக உயிரிழந்தார். மேலும் பூவரசன் படுகாயம் அடைந்தார்.
இதனையடுத்து அந்த பகுதியில் இருந்தவர்கள் படுகாயம் அடைந்தவரை மீட்டு சிகிச்சைக்காக காஞ்சீபுரம் அரசு மருத்துவமனைக்கு அனுப்பி வைத்தனர்.
இதுகுறித்து தகவல் அறிந்ததும் தூசி போலீஸ் இன்ஸ்பெக்டர் ஷாகீன், சப்-இன்ஸ்பெக்டர் பிரபு மற்றும் போலீசார் சம்பவ இடத்துக்கு சென்று, அன்பரசனின் உடலை கைப்பற்றி பிரேத பரிசோதனைக்காக காஞ்சீபுரம் அரசு மருத்துவமனைக்கு அனுப்பி வைத்தனர். இதுதொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
