அக்காள்-தம்பி வீடுகளில் நகை திருட்டு: 2 வாலிபர்கள் கைது

தஞ்சாவூர்,

தஞ்சை விரிவாக்க பகுதிகளில் வழிப்பறி, வீடு புகுந்து திருட்டு போன்ற சம்பவங்கள் நடைபெறாமல் தடுக்கவும், குற்றங்களில் ஈடுபட்டவர்களை பிடிக்கவும் வல்லம் துணை போலீஸ் சூப்பிரண்டு சீத்தாராமன் உத்தரவு பிறப்பித்திருந்தார். அதன்படி தமிழ்ப்பல்கலைக்கழக குற்றப்பிரிவு சிறப்பு சப்-இன்ஸ்பெக்டர்கள் சந்திரசேகரன், சுவாமிநாதன், ஏட்டுகள் இளவரசன், உமாசங்கர், ரமே‌‌ஷ்குமார் ஆகியோர் கொண்ட தனிப்படையினர் தீவிர கண்காணிப்பு பணியில் ஈடுபட்டனர்.தஞ்சை மேலவஸ்தாசாவடி ரவுண்டானா பகுதியில் 2 பேர் சந்தேகத்தின்பேரில் சுற்றி திரிவதாக தனிப்படை போலீசாருக்கு தகவல் கிடைத்தது. அதன்பேரில் போலீசார் விரைந்து சென்று, அந்த 2 பேரையும் பிடித்து விசாரணை நடத்தினர். அப்போது அவர்கள் முன்னுக்குபின் முரணாக பதில் அளித்ததால் சந்தேகம் அடைந்த போலீசார், 2 பேரையும் தமிழ்ப்பல்கலைக்கழக போலீஸ் நிலையத்திற்கு அழைத்து சென்று தீவிர விசாரணை நடத்தினர்.

அதில் அவர்கள் திருச்சி உறையூரை சேர்ந்த பொன்னம்பலம் மகன் மோகன்ராஜ்(வயது32), வடிவேல் மகன் சங்கர்(30) என்பதும், தஞ்சை மேலவஸ்தாசாவடி அசோக்நகர் 8-வது தெருவில் வசித்து வரும் சாமிநாதன், இவருடைய அக்காள் இந்திரா ஆகியோர் வீடுகளின் பூட்டை உடைத்து நகை, வெள்ளிப்பொருட்களை திருடிச் சென்றதும் தெரியவந்தது. இவர்கள் வீடுகளில் 20 பவுன் நகை திருட்டு போனதாக புகார் அளிக்கப்பட்டிருந்தது.

இதையடுத்து 2 பேரையும் போலீசார் கைது செய்து அவர்களிடம் இருந்து ரூ.2 பவுன் நகை, 1½ கிலோ வெள்ளிப்பொருட்கள், செல்போன் ஆகியவற்றை பறிமுதல் செய்தனர். இவர்கள் மீது பல்வேறு மாவட்டங்களில் குற்றவழக்குகள் நிலுவையில் உள்ளன.