தூத்துக்குடி மாவட்டத்தில் விடிய, விடிய கொட்டிய மழை குலசேகரன்பட்டினத்தில் 104 மி.மீ. பதிவு

தூத்துக்குடி, 

தூத்துக்குடி மாவட்டத்தில் விடிய, விடிய மழை கொட்டியது. அதிகப்பட்சமாக குலசேகரன்பட்டினத்தில் 104 மி.மீ. மழை பதிவானது.

பலத்த மழை

வெப்பசலனம் மற்றும் வங்கக்கடலில் நிலவும் காற்றழுத்த தாழ்வு நிலை காரணமாக தமிழகத்தின் கடலோர மாவட்டங்கள் மற்றும் புதுச்சேரியில் மழை பெய்யும் என்று சென்னை மண்டல வானிலை ஆய்வு மையம் சார்பில் தெரிவிக்கப்பட்டது. அதேபோல் தூத்துக்குடி மாவட்டத்தில் நேற்று முன்தினம் இரவு முதல் நேற்று காலை வரை விடிய, விடிய பலத்த மழை பெய்தது.

தூத்துக்குடி நகர் பகுதிகளில் நேற்று முன்தினம் இரவு பெய்த கனமழையால் தூத்துக்குடி வி.இ.ரோடு, டபிள்யு.ஜி.சி. ரோடு, லயன்ஸ் டவுன், தூத்துக்குடி- திருச்செந்தூர் சாலை, பிரையன்ட் நகர் மேற்கு பகுதி ரோடு உள்ளிட்ட பல்வேறு பகுதிகளில் மழைநீர் குளம் போல் தேங்கியது. இதனால் வாகன ஓட்டிகள், காலையில் பள்ளி, கல்லூரி சென்ற மாணவர்கள் அனைவரும் பாதிக்கப்பட்டனர். தூத்துக்குடி-திருச்செந்தூர் சாலையில் மழைநீர் அதிகளவில் தேங்கி காணப்பட்டது. இதனால் அந்த பகுதியில் உள்ள கல்லூரிக்கு சென்ற மாணவர்கள் சிரமத்துடன் மழைநீரில் நடந்து சென்றனர்.

சேறும் சகதியுமாக மாறிய பஸ் நிலையம்

தூத்துக்குடி டபிள்யு.ஜி.சி. ரோட்டில் பழைய மாநகராட்சி அலுவலகம் அருகே உள்ள தூத்துக்குடி நகர் உதவி மின்பொறியாளர் அலுவலகத்துக்குள் மழைநீர் புகுந்தது. இதனால் அங்கு பணியாற்றும் அதிகாரிகள், ஊழியர்கள் மற்றும் பொதுமக்கள் அனைவரும் பாதிக்கப்பட்டனர். இதேபோல் பொன்சுப்பையா நகர், சகாயமாதா பட்டினம், செயின்ட் மேரிஸ் காலனி, பூபால்ராயர்புரம், திரேஸ்புரம், மேட்டுப்பட்டி, ராஜபாளையம் உள்ளிட்ட பகுதிகளிலும் மழைநீர் தேங்கி காணப்பட்டதால் பொதுமக்கள் சிரமம் அடைந்தனர்.

இரவு முழுவதும் கொட்டிய மழையால் தூத்துக்குடி தற்காலிக பஸ் நிலையத்தில் மழைநீர் தேங்கி சேறும், சகதியுமாக மாறியது. இதனால் பஸ் டிரைவர்களும், பயணிகளும் பெரிதும் அவதிப்பட்டனர். இதேபோல் தற்காலிக பஸ் நிலையம் அருகே உள்ள டவுன் பஸ் டெப்போவிலும் மழைநீர் தேங்கி கிடக்கிறது.

வீடுகளுக்குள் தண்ணீர் புகுந்தது

தூத்துக்குடி அருகே முத்தையாபுரம் சூசைநகர் பகுதியை மழைநீர் சூழ்ந்தது. இதில் சுமார் 50 வீடுகளுக்குள் தண்ணீர் புகுந்தது. அந்த பகுதியில் மழைநீர் செல்ல வழி இல்லாததால் பொதுமக்கள் சிரமப்படுகிறார்கள். இதையடுத்து தூத்துக்குடி மாநகராட்சி சார்பில் ஒரு மின்மோட்டார் மூலமும், தன்னார்வ அமைப்புகள் சார்பில் 2 மின்மோட்டார்கள் மூலமும் அங்கு தேங்கி கிடக்கும் தண்ணீரை வெளியேற்றும் பணி நடந்து வருகிறது.

மழை அளவு

தூத்துக்குடி மாவட்டத்தில் அதிகபட்சமாக குலசேகரன்பட்டினத்தில் 104 மில்லி மீட்டர் மழை பதிவாகி உள்ளது. மாவட்டத்தில் நேற்று காலை 8 மணி நிலவரப்படி முடிவடைந்த 24 மணி நேரத்தில் பெய்த மழை அளவு விவரம் (மில்லி மீட்டரில்) வருமாறு:-

திருச்செந்தூர் - 80, காயல்பட்டினம் - 40, விளாத்திகுளம் - 4, வைப்பாறு - 6, கோவில்பட்டி - 1.5, கழுகுமலை - 32, கயத்தாறு - 12, கடம்பூர் - 19, ஓட்டப்பிடாரம் - 5, மணியாச்சி - 75, வேடநத்தம் - 5, கீழ அரசடி - 25, எட்டயபுரம் - 29, சாத்தான்குளம் - 39, ஸ்ரீவைகுண்டம் - 7, தூத்துக்குடி - 38