அரசு பணியாளர்கள் நல கூட்டமைப்பினர் 3-வது நாளாக போராட்டம், ஆட்சியாளர்களின் அநீதிக்கு தி.மு.க. துணைபோகாது - சிவா எம்.எல்.ஏ. பேச்சு

புதுச்சேரி, 

புதுவை பொதுப்பணித் துறையில் பணிபுரியும் வவுச்சர் ஊழியர்கள் (அரசு பணியாளர்கள் நல கூட்டமைப்பினர்) தங்களை தினக்கூலி ஊழியர்களாக பணிநிரந்தரம் செய்ய வேண்டும் என்ற கோரிக்கையை வலியுறுத்தி கடந்த 25-ந்தேதி முதல் தொடர் வேலை நிறுத்த போராட்டத்தில் ஈடுபட்டுள்ளனர். முதல் நாள் சுதேசி மில் அருகே போராட்டத்தில் ஈடுபட்ட அவர்கள் 2-வது நாள் பொதுப்பணித்துறை அலுவலகம் முன்பு உண்ணாவிரதம் இருந்தனர்.

நேற்று 3-வது நாளாக வேலைநிறுத்தத்துடன் உண்ணாவிரதம் சுதேசி மில் அருகே தொடர்ந்தது. சங்க தலைவர் சரவணன் தலைமையில் நிர்வாகிகள் மற்றும் ஊழியர்கள் போராட்டத்தில் ஈடுபட்டனர்.

இதில் நேற்று மாலை சிவா எம்.எல்.ஏ. கலந்துகொண்டு போராட்டத்துக்கு ஆதரவு தெரிவித்து பேசியதாவது:-

அரசுத்துறைகளில் பணியாற்றும் தொழிலாளர்கள் மீது புதுவை அரசுக்கு அக்கறை இல்லை. தொழிலாளர்கள் போராட்டம் நீடித்தால் புதுவையின் நிலைமை மோசமாகிவிடும் என்பதை அரசு கவனத்தில் கொள்ளவேண்டும். புதுச்சேரியில் 10 ஆயிரம் பேர் வேலை இழந்துள்ளனர். 5 ஆயிரத்திற்கும் மேற்பட்டோர் சம்பளம் இல்லாமல் பணியாற்றி வருகிறார்கள். பல ஊழியர்கள் பணி நிரந்தரத்தை எதிர்பார்த்து காத்திருக்கிறார்கள். ஆட்சிக்குத்தான் தி.மு.க. ஆதரவு அளித்து வருகிறது. ஆட்சியாளர்கள் அநீதிக்கு தி.மு.க. துணை போகாது..

இவ்வாறு அவர் பேசினார்.