மழைநீரை அகற்றக்கோரி தூத்துக்குடியில் பொதுமக்கள் சாலை மறியல்

தூத்துக்குடி, 

தூத்துக்குடி மாநகராட்சி பகுதியில் கடந்த சில நாட்களாக பலத்த மழை பெய்தது. இதனால் பல்வேறு இடங்களில் மழைநீர் குளம் போல் தேங்கி கிடக்கிறது. 15 நாட்களுக்கு மேலாக தண்ணீர் தேங்கி கிடப்பதாலும், மழைநீருடன் கழிவுநீரும் கலப்பதாலும் சுகாதார சீர்கேடு ஏற்படும் நிலை உருவாகி உள்ளது.

இதனால் பொதுமக்கள் மிகவும் அவதிப்பட்டு வருகின்றனர். தூத்துக்குடி பாரதிநகர், எஸ்.பி.எம்.நகர், ராஜகோபால்நகர் மற்றும் பல்வேறு பகுதிகளில் இதே நிலை நீடிக்கிறது.

இந்த நிலையில் ராஜகோபால்நகர் பகுதியை சேர்ந்த பொதுமக்கள் நேற்று காலையில் தூத்துக்குடி-பாளையங்கோட்டை ரோட்டில் மில்லர்புரம் பகுதியில் திடீர் சாலை மறியலில் ஈடுபட்டனர்.

இதனால் அந்த பகுதியில் போக்குவரத்து பாதிக்கப் பட்டது. நீண்ட வரிசையில் வாகனங்கள் அணிவகுத்து நின்றன. இதனால் வாக னங்களை போலீசார் மாற்றுப்பாதையில் திருப்பி விட்டனர்.

மேலும் இதுகுறித்து உடனடியாக தூத்துக்குடி தென்பாகம் போலீசுக்கு தகவல் தெரிவிக்கப்பட்டது. தென்பாகம் போலீஸ் இன்ஸ்பெக்டர் கிரு‌‌ஷ்ணகுமார், மத்திய பாகம் போலீஸ் இன்ஸ்பெக்டர் ஜெயப்பிரகா‌‌ஷ், போக்குவரத்து போலீஸ் சப்-இன்ஸ்பெக்டர்கள் வெங்கடே‌‌ஷ், சிவக்குமார் மற்றும் போலீசார் சம்பவ இடத்திற்கு விரைந்து வந்தனர். அவர்கள் சாலை மறியலில் ஈடுபட்ட பொதுமக்களிடம் பேச்சுவார்த்தை நடத்தினர். அதன்பிறகு பொதுமக்கள் அங்கிருந்து கலைந்து சென்றனர். இதனால் அந்த பகுதியில் சிறிது நேரம் பரபரப்பாக காணப்பட்டது.