கோத்தகிரி பகுதியில், மேரக்காய் கொள்முதல் விலை கடும் வீழ்ச்சி - விவசாயிகள் கவலை

கோத்தகிரி,

நீலகிரி மாவட்டம் கோத்தகிரி பகுதி விவசாயிகள் தங்களது விளைநிலங்களில் மட்டுமின்றி, வீட்டு தோட்டங்களிலும் மேரக்காய் பயிரிட்டுள்ளனர். குறிப்பாக நெடுகுளா, வ.உ.சி நகர், எரிசிபெட்டா, மிளிதேன், இந்திரா நகர், சுள்ளிக்கூடு, கட்டபெட்டு மற்றும் கூக்கல்தொரை உள்ளிட்ட பகுதிகளில் நூற்றுக்கணக்கான ஏக்கர் பரப்பளவில் மேரக்காய் பயிரிடப்பட்டு வருகிறது.

கடந்த சில ஆண்டுகளாக பச்சை தேயிலைக்கு உரிய கொள்முதல் விலை கிடைக்காததால் ஏராளமான விவசாயிகள் மாற்றுப் பயிராக தங்களது விவசாய நிலங்களில் மேரக்காய் பந்தல் அமைத்து மேரக்காய் பயிரிட்டு உள்ளனர். சாதாரணமாக ஒரு கிலோ மேரக்காய்க்கு ரூ.30 முதல் ரூ.45 வரை நிலையான கொள்முதல் விலை கிடைத்து வந்தது. இதனால் மேரக்காயை பயிரிட்டுள்ள விவசாயிகளுக்கு கணிசமான லாபம் கிடைத்தது.

மேரக்காய் தோட்டங்களில் கரடி, காட்டெருமை உள்ளிட்ட வனவிலங்குகள் மற்றும் குரங்குகள் தொல்லை காரணமாக மேரக்காய் பயிர்கள் சேதமடைந்து வந்தாலும் போதிய கொள்முதல் விலை கிடைத்து வந்த காரணத்தால் விவசாயிகளுக்கு ந‌‌ஷ்டம் ஏதும் ஏற்படவில்லை.

இந்தநிலையில் கடந்த சில மாதங்களாக கோத்தகிரி மற்றும் அதன் சுற்றுவட்டார பகுதிகளில் பரவலாக மழை பெய்ததால் மேரக்காய் விளைச்சல் அதிகரித்தது. இதனால் கடந்த சில நாட்களாகவே மேட்டுப்பாளையம் மற்றும் கோத்தகிரி காய்கறி மண்டிகளில் மேரக்காய் கொள்முதல் விலை கடும் வீழ்ச்சியடைந்து உள்ளது.

ஒரு கிலோ மேரக்காய் அதிகபட்சமாக ரூ.10-க்கு மட்டுமே கொள்முதல் செய்யப்படுகிறது. இதனால் மேரக்காய் பயிரிட்டுள்ள விவசாயிகளுக்கு ந‌‌ஷ்டம் ஏற்படும் நிலை ஏற்பட்டுள்ளதால் அவர்கள் கவலை அடைந்து உள்ளனர்.

இதுகுறித்து கோத்தகிரி பகுதி விவசாயிகள் கூறியதாவது:- ஒரு ஏக்கர் நிலத்தில் மேரக்காய் பயிரிட பந்தல் அமைத்து விவசாயம் செய்ய ரூ.3 லட்சம் முதல் ரூ.4 லட்சம் வரை செலவாகிறது. தொழிலாளர் பற்றாக்குறை, உரம் மற்றும், இடு பொருட்களின் விலையேற்றம், வனவிலங்குகள் தொல்லை உள்ளிட்ட பிரச்சினைகளை எதிர்கொண்டு வங்கி கடன் பெற்று விவசாயம் மேற்கொண்டு வருகிறோம்.

எங்களது தோட்டங்களில் அறுவடை செய்த மேரக்காய்களை காய்கறி மண்டிகளுக்கு விற்பனைக்காக கொண்டு செல்லும் போக்குவரத்து செலவு கூட விவசாயிகளுக்கு கிடைப்பதில்லை. தற்போது மேரக்காய் விலை கடுமையாக வீழ்ச்சி அடைந்து உள்ளது. அதனால் எங்களுக்கு பெரிய அளவில் ந‌‌ஷ்டம் ஏற்பட்டு உள்ளது.

இவ்வாறு அவர்கள் கூறினர்.