திருச்சி-திருவாரூர் ரெயில் பாதைமின்மயமாக்கும் பணிநிறைவு: காரைக்கால் வரையிலான பணிகளை மார்ச் மாதத்துக்குள் முடிக்க திட்டம்

தஞ்சாவூர்,

தஞ்சை ரெயில் வழித்தடம் மிகவும் பழமை வாய்ந்தது ஆகும். முன்பு இந்த வழியாகத்தான் சென்னை போன்ற பகுதிகளுக்கும், தென்மாவட்டங்களுக்கும் அதிக அளவில் ரெயில்கள் இயக்கப்பட்டன. அப்போது தஞ்சை வழித்தடம் தான் மெயின் லைனாக இருந்தது. நாளடைவில் திருச்சி-விழுப்புரம் இடையே அகல ரெயில்பாதை அமைக்கப்பட்டு ரெயில்கள் அந்த வழியாக இயக்கப்பட்டன. தஞ்சை வழியாக ரெயில்கள் இயக்குவது குறைக்கப்பட்டன.

தற்போது தஞ்சை வழியாக 15-க்கும் மேற்பட்ட எக்ஸ்பிரஸ் ரெயில்களும், 20-க்கும் மேற்பட்ட பயணிகள் ரெயில்களும், வேளாங்கண்ணி, திருச்சி, மயிலாடுதுறை, காரைக்கால், எர்ணாகுளம், திருநெல்வேலி, ராமேசுவரம், கோவை, சென்னை, கன்னியாகுமரி, புதுச்சேரி, திருச்செந்தூர், வாரணாசி, பெங்களூரு உள்ளிட்ட இடங்களுக்கும் இயக்கப்பட்டு வருகின்றன.

மின்மயமாக்கல் பணி

இந்த நிலையில் தஞ்சை-திருச்சி இடையே இரட்டை ரெயில்பாதை அமைக்கும் பணிகள் மேற்கொள்ளப்பட்டு தற்போது அது பயன் பாட்டுக்கு வந்து விட்டன. தற்போது இந்த வழித்தடத்தில் டீசல் மூலம் ரெயில்கள் இயக்கப்பட்டு வருகின்றன.

இதையடுத்து திருச்சி-காரைக்கால் இடையே மின்மயமாக்கும் பணிகள் தொடங்கப்பட்டன. இதன் மொத்த தூரம் 153 கி.மீ. ஆகும். இதற்காக ரூ.250 கோடி நிதி ஒதுக்கப்பட்டது. இந்த பணிகளை இந்திய ரெயில்வேயின் மின்மயமாக்கல் பிரிவு மேற்கொண்டுள்ளது.

தஞ்சை-திருச்சி இடையே இருவழிப்பாதை என்பதால் இரண்டு வழித்தடத்திலும் மின்மயமாக்கல் பணிகள் மேற்கொள்ளப்பட்டுள்ளன. இதற்காக தஞ்சை-திருச்சி இடையே இருவழிப்பாதையிலும், ஒரு பாதைக்கு தலா 1,200 உயர் அழுத்த மின் கம்பங்கள் வீதம் இருவழிப் பாதையிலும் 2,400 மின் கம்பங்கள் அமைக்கப்பட்டுள்ளன.

சோதனை ஓட்டம்

இந்த பணிகள் அனைத்தும் முடிந்து கடந்த மார்ச் மாதம் சோதனை ஓட்டமும் நடத்தப்பட்டு விட்டன. இதுதவிர மின் ரெயில்சேவை வழித்தடத்தில் ரெயில்களின் வேகத்தை அதிகரிப்பது தொடர்பான சோதனை ஓட்டமும் நடத்தப்பட்டது.

2-வது கட்டமாக தஞ்சையில் இருந்து திருவாரூர் வரையிலான 54 கி.மீ தூரத்திற்கும் மின்மயமாக்கல் பணிகள் முடிந்து சோதனை ஓட்டம் கடந்த 22-ந் தேதி நடத்தப்பட்டது. 1 மணி நேரத்திற்கு 90 கி.மீ. வேகத்தில் இந்த சோதனை ஓட்டம் நடத்தப்பட்டது.

மார்ச் மாதம் முடியும்

இது குறித்து ரெயில்வே அதிகாரி ஒருவர் கூறுகையில், ‘‘தஞ்சையில் இருந்து திருவாரூர் வரையிலான மின்மயமாக்கல் பணிகளை ஆய்வு செய்யுமாறு பெங்களூருவில் உள்ள ரெயில்வே பாதுகாப்பு ஆணையரிடம் ஆவணங்கள் சமர்ப்பிக்கப்பட்டுள்ளன. அவர் ஆய்வு தேதியை முடிவு செய்து அறிவிப்பார். அவர் அனுமதி அளித்த பிறகு மின்சார ரெயில் இயக்கப்படும்.

திருச்சி- காரைக்கால் மின்மயமாக்கல் திட்டத்தின் கடைசி கட்டமான திருவாரூரில் இருந்து காரைக்கால் வரையிலான மின்மயமாக்கல் பணிகளில் கீழ்வேளூர் வரை முற்றிலும் முடிவடைந்து விட்டன. மற்ற பகுதிகளில் பணிகள் நடைபெற்று வருகின்றன. வருகிற மார்ச் மாதத்திற்குள் காரைக்கால் வரையிலான பணிகளை முடிக்க ரெயில்வே வாரியம் உத்தரவிட்டுள்ளது. அதற்குள் பணிகள் முடிக்கப்படும்.

மின் இணைப்பு

இந்த திட்டத்தில் தஞ்சை, திருவாரூர், காரைக்கால் ஆகிய இடங்களில் துணை மின் நிலையங்கள் அமைக்கப்படுகின்றன. இதில் தஞ்சையில் துணை மின் நிலையம் அமைக்கும் பணிகள் முடிவடைந்து விட்டது. மின்வாரியத்திடம் இருந்து மின் இணைப்புக்கான அனுமதிக்காக காத்திருக்கிறோம்.

காரைக்கால் வரை பணிகள் முடிவடைந்ததும் நாகையில் இருந்து வேளாங்கண்ணி வரையிலான குறுகிய தூரத்தில் மின் மயமாக்கல் பணிகள் மேற்கொள்ளப்படும்’’ என்றார்.