15 பாடங்களில் தேர்ச்சி பெறாததால் என்ஜினீயரிங் கல்லூரி விடுதியில் மாணவர் தூக்குப்போட்டு தற்கொலை

கோவை,

சேலம் மாவட்டம் மேட்டூரை சோ்ந்தவர் விஜயசேகர். டிரைவர். இவருடைய மகன் கமலேஷ் (வயது 21). இவர் கோவை பீளமேட்டில் உள்ள பி.எஸ்.ஜி. தொழில்நுட்ப கல்லூரியில் என்ஜினீயரிங் 4-ம் ஆண்டு படித்து வந்தார். இவர் கல்லூரி விடுதியில் தங்கியிருந்து தினமும் கல்லூரிக்கு சென்று வந்தார்.

நேற்று முன்தினம் காலையில் விடுதியில் இருந்து கமலேசின் நண்பர்கள் கல்லூரிக்கு புறப்பட்டனர். ஆனால் கமலேஷ் மட்டும் அறையிலேயே இருந்தார். இதை பார்த்த நண்பர்கள் கல்லூரிக்கு நேரமாகிறது வா என்று அழைத்தனர். அதற்கு அவர், பிறகு வருவதாக கூறியதால் நண்பர்கள் சென்று விட்டனர்.

ஆனால் கமலேஷ் கல்லூரிக்கு வராததால், நண்பர்கள் தேனீர் இடைவேளையின்போது விடுதிக்கு வந்தனர். அங்கு அறையை திறந்து பார்த்தபோது மின்விசிறியில் கமலேஷ் தூக்கில் தொங்கியபடி பிணமாக கிடந்தார். இதைப்பார்த்து அதிர்ச்சியடைந்த நண்பர்கள் கொடுத்த தகவலின் பேரில் பீளமேடு போலீசார் சம்பவ இடத்துக்கு விரைந்து வந்தனர்.

அவர்கள், கமலேசின் உடலை மீட்டு பிரேதபரிசோதனைக்காக கோவை அரசு ஆஸ்பத்திரிக்கு கொண்டு சென்றனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர். முதற்கட்ட விசாரணையில், கமலேஷ், 15 பாடங்களில் தேர்ச்சி பெறாததால் மன வருத்தத்தில் இருந்தார். இதன் காரணமாக அவர் மனமுடைந்து தூக்குப்போட்டு தற்கொலை செய்துகொண்டது தெரியவந்தது.