மீன்பிடித்து திரும்பியபோது படகில் இருந்து தவறி விழுந்த மீனவர் கடலில் மூழ்கி சாவு

காரைக்கால்,

காரைக்கால் கோட்டுச்சேரி மேட்டை சேர்ந்தவர் பாலசந்திரன். இவருக்கு சொந்தமான மீன்பிடி படகில் மனோகரன் (வயது 32) உள்ளிட்ட 7 பேர் கடந்த 20-ந் தேதி காரைக்கால் மீன்பிடி துறைமுகத்தில் இருந்து வேதாரண்யம் அருகே கடலில் மீன் பிடிக்கச் சென்றனர்.

அங்கு மீன்பிடித்துக் கொண்டு நேற்று முன்தினம் மாலை அவர்கள் அனைவரும் கரை திரும்பினர். அப்போது படகின் ஓரம் நின்று இருந்த மனோகரன் நிலைதடுமாறி திடீரென கடலில் விழுந்து மூழ்கினார். இதைப்பார்த்ததும் அதிர்ச்சி அடைந்த சக மீனவர்கள் கடலில் வலைவீசி அவரை தேடிப் பார்த்தனர்.

நீண்ட நேரத்திற்கு பிறகு இறந்த நிலையில் அவரது உடலை மீனவர்கள் கைப்பற்றினர். நேற்று மனோகரன் உடலுடன் கரை திரும்பிய மீனவர்கள் இதுகுறித்து நிரவி போலீஸ் நிலையத்தில் புகார் கொடுத்தனர். அதன்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.