சித்தாள் கிராமம் வழியாக பஸ் இயக்கக்கோரி பொதுமக்கள் சாலை மறியல்

ரிஷிவந்தியம், 

ரி‌ஷிவந்தியம் அருகே சித்தாள் கிராமத்தில் அரசு மாதிரி பள்ளி உள்ளது. இந்த பள்ளியில் ரி‌ஷிவந்தியம் பகுதியை சேர்ந்த 60-க்கும் மேற்பட்ட மாணவர்கள் படித்து வருகின்றனர். இவர்கள் திருக்கோவிலூரில் இருந்து சித்தாள் கிராமம் வழியாக கள்ளக்குறிச்சிக்கு செல்லும் அரசு பஸ்சில் பள்ளிக்கு சென்று வந்தனர். இந்த பஸ் கடந்த சில நாட்களாக இயக்கப்படவில்லை. இதனால் மாணவர்கள் பெரும் அவதி அடைந்தளர். இது குறித்து புகார் அளித்த பின்பும் சம்பந்தப்பட்ட அதிகாரிகள் நடவடிக்கை எடுக்கவில்லை.

இதனால் ஆத்திரமடைந்த பள்ளி மாணவர்கள், பெற்றோர்கள் மற்றும் பொதுமக்கள் நேற்று திருக்கோவிலூரில் ஒன்று திரண்டனர். பின்னர் அவர்கள் அங்குள்ள தியாகதுருகம்- திருக்கோவிலூர் சாலையில் மறியலில் ஈடுபட்டனர்.

இது குறித்த தகவலின் பேரில் ரி‌ஷிவந்தியம் போலீசார் சம்பவ இடத்திற்கு விரைந்து வந்து போராட்டத்தில் ஈடுபட்டவர்களுடன் பேச்சுவார்த்தை நடத்தினர். அப்போது இது குறித்து சம்பந்தப்பட்ட அதிகாரிகளிடம் பேசி முறையாக பஸ் இயக்க நடவடிக்கை எடுக்கப்படும் என்று போலீசார் தெரிவித்தனர்.

அதனை ஏற்று பொதுமக்கள் சாலை மறியலை கைவிட்டு அங்கிருந்து கலைந்து சென்றனர். இந்த சம்பவத்தால் அப்பகுதியில் சிறிது நேரம் போக்குவரத்து பாதிக்கப்பட்டது.