மணப்பாறை அருகே ஜல்லிக்கட்டில் 600 காளைகள் சீறிப்பாய்ந்தன மாடுகள் முட்டி 13 பேர் காயம்

திருச்சி,

திருச்சி மாவட்டம், மணப்பாறையை அடுத்த மஞ்சம்பட்டியில் புனித வனத்து அந்தோணியார் ஆலய திருவிழாவை முன்னிட்டு நேற்று ஜல்லிக்கட்டு நடைபெற்றது. மாடுபிடி வீரர்கள் உறுதிமொழி எடுத்துக்கொண்ட பின்னர் ஜல்லிக்கட்டை மணப்பாறை தாசில்தார் தமிழ்கனி, போலீஸ் துணை சூப்பிரண்டு குத்தாலிங்கம் மற்றும் ஊர் முக்கியஸ்தர்கள் தொடங்கி வைத்தனர். இதில் முதலில் மேலமஞ்சம்பட்டி மாரியம்மன் கோவில் காளை வாடிவாசலில் இருந்து அவிழ்த்து விடப்பட்டது.

பின்னர் உள்ளூர் காளைகளும், திருச்சி, திண்டுக்கல், மதுரை, சிவகங்கை, புதுக்கோட்டை, கரூர் உள்ளிட்ட பல்வேறு மாவட்டங்களில் இருந்து அழைத்து வரப்பட்ட காளைகளும் அவிழ்த்து விடப்பட்டன.

இதில் பல காளைகள் வாடிவாசலில் இருந்து மின்னல் வேகத்தில் சென்றது. சில காளைகள் வாடிவாசலில் இருந்து துள்ளிக்குதித்து வெளியே வந்து, அடக்க வந்த வீரர்களை முட்டித்தூக்கி பந்தாடியது. இருப்பினும் வீரர்கள், தங்கள் வீரத்தை வெளிப்படுத்தும் வகையில், ஆக்ரோஷம் காட்டிய பல காளைகளை அடக்கி அசத்தினர்.

13 பேர் காயம்

இந்த ஜல்லிக்கட்டில் 600 காளைகளும், 338 வீரர்களும் கலந்து கொண்டனர். இதில் மாடுகள் முட்டித் தள்ளியதில் 13 பேர் காயமடைந்தனர். அவர்களுக்கு அங்கு அமைக்கப்பட்டிருந்த மருத்துவ முகாமில் சிகிச்சை அளிக்கப்பட்டது. முன்னதாக வீரர்களை மருத்துவக்குழுவினரும், காளைகளை கால்நடை மருத்துவக்குழுவினரும் பரிசோதனை செய்த பின்னரே போட்டிக்கு அனுப்பி வைக்கப்பட்டனர்.

ஜல்லிக்கட்டில் காளையை அடக்கிய வீரர்களுக்கும், வெற்றி பெற்ற காளைகளின் உரிமையாளர் களுக்கும் கட்டில், பீரோ, சைக்கிள், ஆட்டுக்குட்டி, நாட்டுக்கோழி, சில்வர் பாத்திரங்கள், எல்.இ.டி. டி.வி., தங்க மோதிரம் மற்றும் ரொக்கப்பணம் உள்ளிட்ட பல்வேறு பரிசுகள் வழங்கப்பட்டது.

ஆரவாரம் செய்த பார்வையாளர்கள்

நேற்று விடுமுறை தினம் என்பதால் ஆயிரக்கணக்கானோர் திரண்டு, கொளுத்தும் வெயிலையும் பொருட்படுத்தாமல் நின்று ஜல்லிக்கட்டை கண்டு ரசித்ததோடு, காளைகள் களத்தில் விளையாடியபோதும், வீரர்கள் காளை களை பிடித்தபோதும் ஆரவாரம் செய்தனர்.

ஜல்லிக்கட்டுக்கான பாதுகாப்பு பணியில் திருச்சி மாவட்ட போலீஸ் சூப்பிரண்டு ஜியாவுல் ஹக் மேற்பார்வையில் மணப்பாறை போலீஸ் துணை சூப்பிரண்டு குத்தாலிங்கம் தலைமையிலான போலீசார் ஈடுபட்டனர்.