மதுரைக்கு இன்று வருகை தரும் எடப்பாடி பழனிசாமிக்கு உற்சாக வரவேற்பு அமைச்சர்கள் செல்லூர் ராஜூ, ஆர்.பி. உதயகுமார், ராஜன் செல்லப்பா எம்.எல்.ஏ. ஏற்பாடு

மதுரை,

மதுரைக் கல்லூரி மைதானத்தில் நடைபெற்ற கிரிக்கெட் போட்டியை அமைச்சர் ஆர்.பி.உதயகுமார் பேட்டிங் செய்து தொடங்கி வைத்தார். பின்னர் அவர் நிருபர்களிடம் கூறியதாவது:-

விளையாட்டு வீரர்களுக்கு பல்வேறு திட்டங்களை ஜெயலலிதா செயல்படுத்தினார். அவர் வழியில் தற்போது முதல்-அமைச்சரும் விளையாட்டு துறைக்கு பல்வேறு திட்டங்களை செயல்படுத்தி வருகிறார். சமீபத்தில் சேலத்தில் கிரிக்கெட் மைதானத்தை முதல்-அமைச்சர் திறந்து வைத்தார். மருத்துவக் கல்லூரிகளை உருவாக்கித் தந்த முதல்-அமைச்சருக்கு நன்றி தெரிவிக்கும் வகையில் மதுரைக்கு இன்று (ஞாயிற்றுக் கிழமை) வரும் அவருக்கு அ.தி.மு.க. ஜெயலலிதா பேரவையின் சார்பில் பூர்ண கும்ப மரியாதை, கிராமிய கலை நிகழ்ச்சி உள்ளிட்டவையுடன் சிறப்பான வரவேற்பு அளிக்கப்படுகிறது.

காலை 7 மணிக்கு விமான நிலையத்திலும், அதை தொடர்ந்து மதியம் 2 மணி அளவில் கப்பலூர் டோல்கேட், திருமங்கலம் நகரம், மேலக்கோட்டை, சிவரக்கோட்டை, கள்ளிகுடி ஆகிய 5 பகுதிகளில் மிக சிறப்பான முறையில் எழுச்சிமிகு வரவேற்பை முதல்-அமைச்சருக்கும் அவருக்கு உறுதுணையாக இருக்கும் துணை முதல்-அமைச்சருக்கும் அளிக்கப்படுகிறது. இந்த வரவேற்பு நிகழ்ச்சியில் பொதுமக்களும் பெருந்திரளாக பங்கேற்கின்றனர். இவ்வாறு அவர் தெரிவித்தார்.

மதுரை மாநகர் மாவட்ட அ.தி.மு.க. செயலாளரான அமைச்சர் செல்லூர் ராஜூ வெளியிட்டுள்ள அறிக்கையில் கூறியிருப்பதாவது:-

மதுரை மாநகர வளர்ச்சிக்கு பல்வேறு திட்டங்களை அறிவித்து செயல்படுத்தி வரும் முதல்-அமைச்சர் எடப்பாடி பழனிசாமி தமிழக வரலாற்றில் 11 மருத்துவக்கல்லூரிக்கு புதிதாக அனுமதி பெற்று சாதனை படைத்துள்ளார். மருத்துவக் கல்லூரி அடிக்கல் நாட்டு விழாவிற்கு ராமநாதபுரம், விருதுநகர் மாவட்டத்திற்கு வருகை தரும் முதல்-அமைச்சருக்கு மதுரை மாநகர் மாவட்ட அ.தி.மு.க. சார்பில் மதுரை மக்கள் திரளாக பங்கு பெறும் வகையில் விரகனூர் சந்திப்பில் இன்று காலை 7 மணி அளவில் உற்சாக வரவேற்பு அளிக்கப்படுகிறது. இதில் அனைத்து நிர்வாகிகள் மற்றும் பொதுமக்கள் பெரும் திரளாக கலந்து கொள்ளும்படி வேண்டுகிறோம். இவ்வாறுஅதில் கூறப்பட்டுள்ளது.

மதுரை புறநகர் கிழக்கு மாவட்ட செயலாளர் ராஜன்செல்லப்பா எம்.எல்.ஏ. வெளியிட்டுள்ள அறிக்கையில் கூறியிருப்பதாவது:-

ராமநாதபுரம், விருதுநகர் மாவட்டங்களில் புதிய மருத்துவக்கல்லூரிக்கு அடிக்கல் நாட்டும் விழாவிற்கு வருகை தரும் முதல்-அமைச்சர் எடப்பாடி பழனிசாமிக்கு மதுரை புறநகர் கிழக்கு மாவட்ட அ.தி.மு.க.சார்பில் பெருங்குடி சந்திப்பில் சிறப்பான வரவேற்பு அளிக்கப்படுகிறது. மாவட்ட நிர்வாகிகள், பொதுமக்கள் திரளாக பங்கேற்கும் இந்த நிகழ்ச்சியில் பாரம்பரிய கலை நிகழ்ச்சிகளும் இடம் பெறுகிறது. இவ்வாறு அதில் கூறப்பட்டுள்ளது.