ஏரிப்புதூர் கிராமத்தில், காளைவிடும் விழாவில் மாடுகள் முட்டியதில் 18 பேர் காயம்

அணைக்கட்டு,

அணைக்கட்டு தாலுகா ஏரிப்புதூர் கிராமத்தில் உள்ள இருப்பாச்சியம்மன் கோவில் திருவிழாவை முன்னிட்டு 30-ம் ஆண்டாக காளைவிடும் விழா நடந்தது. இதில் ஆந்திரா, வாணியம்பாடி, குடியாத்தம், ஒடுகத்தூர், பள்ளிகொண்டா மற்றும் சுற்றுப்புற கிராமங்களில் இருந்து 160 காளைகள் கொண்டுவரப்பட்டன. காளைவிடும் விழாவை காண ஆயிரக்கணக்கான பொதுமக்கள், இளைஞர்கள் அங்குள்ள கோவில் மீதும் வீடுகளின் மாடிகள் மீதும் அமர்ந்து சீறிப்பாய்ந்து ஓடிய காளைகளை ரசித்தனர்.

காளைகளை ஊசூர் கால்நடை மருத்துவர் ரகு பரிசோதனை செய்தார். அதைத் தொடர்ந்து காளைவிடும் விழாவை உதவி ஆணையர் (கலால்) பூங்கொடி அனுமதியுடன் தாசில்தார் முரளிகுமார், அவைத்தலைவர் வெங்கடேசன் ஆகியோர் கொடியசைத்து தொடங்கி வைத்தனர்.

அதைத் தொடர்ந்து காளைகள் வாடிவாசல் வழியாக சீறிப்பாய்ந்து ஓடின. காளை ஓடும் தெருவின் இருபுறமும் சவுக்கு கட்டைகளால் ஆன தடுப்புகள் அமைக்கப்பட்டிருந்தன. பார்வையாளர்கள் காளை ஓடும் தெருவில் நின்றுகொண்டு காளைகளை உற்சாகப்படுத்தினர். அப்போது பல காளைகள் தெருவில் ஓடாமல் பார்வையாளர்கள் பக்கம் ஓடின. இதனால் வாலிபர்கள் சிதறி ஓடினார்கள். அப்போது வேடிக்கை பார்த்து கொண்டிருந்தவர்களை காளைகள் முட்டியதில் 18 பேர் காயம் அடைந்தனர்.

இதில் 4 பேர் படுகாயம் அடைந்தனர். அவர்களை மேல் சிகிச்சைக்காக வேலூர் அடுக்கம்பாறை அரசு மருத்துவ மனைக்கு அனுப்பி வைத்தனர். மற்றவர்களுக்கு காளைவிடும் விழாவில் முகாமிட்டிருந்த ஒடுகத்தூர் வட்டார மருத்துவ அலுவலர் டாக்டர் கைலா‌‌ஷ் தலைமையில் மருத்துவர்கள் சீனிவாசன், தீபிகா குழுவினர் சிகிச்சை அளித்தனர்.

வெற்றி பெற்ற காளைகளின் உரிமையாளர்களுக்கு பரிசு வழங்கப்பட்டது. விழாவையொட்டி வருவாய் ஆய்வாளர் முகமது சாதிக், கிராம நிர்வாக அலுவலர்கள் பிரம்மகனி, ரேவதி மற்றும் காளைவிடும் நிர்வாக குழுவினர் கண்காணிப்பு பணியில் ஈடுபட்டனர். அணைக்கட்டு, வேப்பங்குப்பம், பள்ளிகொண்டா போலீசார் பாதுகாப்பு பணியில் ஈடுபட்டனர்.

ஏற்பாடுகளை ஏரிப்புதூர் கிராம பொதுமக்கள் செய்திருந்தனர்.