ஆத்தூர் அருகே, திருமணமான 6 மாதங்களில் புதுப்பெண் தீக்குளித்து தற்கொலை - உதவி கலெக்டர் விசாரணை

ஆறுமுகநேரி, 

தூத்துக்குடி மாவட்டம் ஆத்தூர் அருகே பழையகாயல் சர்வோதயபுரியைச் சேர்ந்தவர் மாயாண்டி. இவருடைய மகள் லிங்கஜோதி (வயது 19). இவருக்கும், பாளையங்கோட்டை ஐ.ஓ.பி. காலனியைச் சேர்ந்த செல்லையா மகன் லாரி கிளீனரான முருகனுக்கும், கடந்த 6 மாதங்களுக்கு முன்பு திருமணம் நடந்தது.

பின்னர் லிங்கஜோதி தன்னுடைய கணவரின் வீட்டில் வசித்து வந்தார். இந்த நிலையில் கணவன்–மனைவி இடையே கருத்து வேறுபாடு ஏற்பட்டது. இதையடுத்து கடந்த சில நாட்களுக்கு முன்பு முருகன் தன்னுடைய மனைவியை பழையகாயலில் உள்ள மாமனாரின் வீட்டில் விட்டு விட்டு, சென்னைக்கு வேலைக்கு செல்வதாக கூறி சென்றார்.

பின்னர் முருகன் செல்போனில் தொடர்பு கொண்டு மனைவி லிங்கஜோதியிடம் பேசியபோது, அவர் வேறு பெண்ணை திருமணம் செய்ய உள்ளதாக தெரிவித்து உள்ளார். இதனால் மனமுடைந்த லிங்கஜோதி சம்பவத்தன்று இரவில் வீட்டில் தனது உடலில் மண்எண்ணெய் ஊற்றி தீ வைத்துக் கொண்டார். இதில் உடல் கருகி பலத்த காயம் அடைந்த அவரை தூத்துக்குடி அரசு ஆஸ்பத்திரியில் அனுமதித்து தீவிர சிகிச்சை அளித்தனர். ஆனாலும் சிகிச்சை பலனின்றி நேற்று முன்தினம் மாலையில் லிங்கஜோதி பரிதாபமாக உயிரிழந்தார்.

இதுகுறித்த புகாரின்பேரில், ஆத்தூர் போலீசார் வழக்குப்பதிவு செய்து விசாரணை நடத்தி வருகின்றனர். திருமணமான 6 மாதங்களில் புதுப்பெண் தீக்குளித்து தற்கொலை செய்ததால், தூத்துக்குடி உதவி கலெக்டர் சிம்ரான்ஜித்சிங் கலோன் மேல் விசாரணை நடத்தி வருகிறார். இந்த சம்பவம் அப்பகுதியில் பெரும் சோகத்தை ஏற்படுத்தியது.