விழுப்புரத்தில், கொரோனாவுக்கு அரிசி ஆலை அதிபர் சாவு - தமிழகத்தில் பலி எண்ணிக்கை 15 ஆக உயர்வு

விழுப்புரம்,

உலகையே அச்சுறுத்தி வரும் கொரோனா வைரசின் தாக்கம் நாளுக்கு நாள் அதிகரித்து வருகிறது. தமிழகத்தில் இந்நோய் தொற்றினால் 1,250-க்கும் மேற்பட்டோர் பாதிக்கப்பட்டுள்ளனர். இவர்களில் பெரும்பாலானவர்கள் டெல்லி நிஜாமுதீனில் கடந்த மார்ச் மாதம் நடந்த முஸ்லிம் மாநாட்டில் கலந்துகொண்டு தமிழகம் திரும்பியுள்ளவர்கள் என்று தெரியவந்தது.

இதையடுத்து கொரோனா நோய் தடுப்பு நடவடிக்கையை தமிழக அரசு தீவிரப்படுத்தியது. தமிழகத்தின் அனைத்து மாவட்டங்களில் இருந்தும் யார், யாரெல்லாம் டெல்லி மாநாட்டிற்கு சென்று வந்துள்ளனர் என்ற விவரங்கள் சேகரிக்கப்பட்டு அவர்களை கண்டறிந்து அரசு மருத்துவமனையின் தனி வார்டுகளில் அனுமதித்து தீவிர சிகிச்சை அளிக்கப்பட்டு வருகிறது.

அந்த வகையில் விழுப்புரம் மாவட்டத்தில் இருந்து டெல்லி மாநாட்டிற்கு சென்று திரும்பியவர்களின் விவரங்கள் சேகரிக்கப்பட்டது. இதில் விழுப்புரம் மாவட்டத்தை சேர்ந்த 77 பேர் கண்டறியப்பட்டு அவர்கள் விழுப்புரம் நகரில் உள்ள கொரோனா சிறப்பு மருத்துவமனையிலும், முண்டியம்பாக்கத்தில் உள்ள அரசு மருத்துவக்கல்லூரி மருத்துவமனையின் தனி வார்டிலும் அனுமதிக்கப்பட்டனர். இவர்களை 24 மணி நேரமும் மருத்துவ குழுவினர் தீவிரமாக கண்காணித்து வந்ததோடு அவர்களது ரத்த மாதிரிகளை பரிசோதனை செய்தனர். இதில் டெல்லி வாலிபர் உள்பட 23 பேர் பாதிக்கப்பட்டது தெரியவந்தது. இந்த வைரஸ் தொற்றால் பாதிக்கப்பட்ட விழுப்புரத்தை சேர்ந்த அரசு பள்ளி தலைமை ஆசிரியர் ஒருவர், கடந்த 4-ந் தேதி பலியானார். மற்ற 22 பேரும் முண்டியம்பாக்கம் அரசு மருத்துவமனையில் தீவிர சிகிச்சை பெற்று வருகின்றனர்.

இதனிடையே ஒரே மாவட்டத்தில் கொரோனா பாதிப்பு 15-க்கும் மேற்பட்டவர்களுக்கு இருந்தால் அந்த மாவட்டங்கள் அதிகம் பாதிப்புக்கு உள்ளான ‘ஹாட்ஸ்பாட்’ மாவட்டங்களாக மத்திய அரசு அறிவித்தது. அந்த பட்டியலில் விழுப்புரமும் ‘ஹாட்ஸ்பாட்’ மாவட்டமாக அறிவிக்கப்பட்டுள்ள இந்த சூழலில் கொரோனா தொற்றால் விழுப்புரத்தில் மேலும் ஒருவர் இறந்துள்ளார். அதன் விவரம் வருமாறு:-

விழுப்புரம் பானாம்பட்டு பகுதியை சேர்ந்த 57 வயதுடைய அரிசி ஆலை அதிபர் நேற்று முன்தினம் காய்ச்சல் மற்றும் மூச்சுத்திணறல் பாதிப்பினால் விழுப்புரத்தில் உள்ள ஒரு தனியார் மருத்துவமனையில் சேர்க்கப்பட்டார். அங்கு அவருக்கு முதலுதவி அளித்தனர். பின்னர் அவரை மேல்சிகிச்சைக்காக முண்டியம்பாக்கம் அரசு மருத்துவக்கல்லூரி மருத்துவமனைக்கு அனுப்பி வைத்தனர். அவருக்கு கொரோனா அறிகுறி இருக்குமோ? என்ற சந்தேகத்தின் அடிப்படையில் அவரை அங்குள்ள தனி வார்டில் அனுமதித்து டாக்டர்கள் தீவிர சிகிச்சை அளித்தனர். அதோடு அவருடைய ரத்த மாதிரிகளையும் சோதனைக்காக எடுத்தனர்.

இந்நிலையில் அவருக்கு மூச்சு திணறல் அதிகமாகி சிகிச்சை பலனின்றி பரிதாபமாக இறந்தார். அவருடைய மருத்துவ பரிசோதனை முடிவு நேற்று முன்தினம் வராததால் அவரது உடலை உறவினர்களிடம் ஒப்படைக்காமல் மருத்துவமனையிலேயே பாதுகாப்பாக வைத்திருந்தனர்.

இந்த சூழலில் நேற்று காலை அவருடைய மருத்துவ பரிசோதனை அறிக்கை வரப்பெற்றது. இதில் அவருக்கு கொரோனா தொற்று இருப்பது உறுதி செய்யப்பட்டது.

இதையடுத்து அவருடைய உடல் முண்டியம்பாக்கம் அரசு மருத்துவ கல்லூரி மருத்துவமனையில் இருந்து விழுப்புரம் விராட்டிக்குப்பம் பாதையில் உள்ள கபர்ஸ்தானுக்கு (முஸ்லிம்களை நல்லடக்கம் செய்யும் இடம்) கொண்டு செல்லப்பட்டது. பின்னர் அங்கு அவரது உடல், உறவினர்கள் முன்னிலையில் போலீஸ் பாதுகாப்புடன், அடக்கம் செய்யப்பட்டது.

மேலும் இறந்த அந்த நபரால் அவரது குடும்பத்தினருக்கும் இந்நோய் தொற்று பரவியிருக்கலாம் என்ற சந்தேகத்தின்பேரில் அவரது குடும்பத்தினரை மருத்துவ குழுவினர் தனிமைப்படுத்தி விழுப்புரத்தில் உள்ள கொரோனா சிறப்பு மருத்துவமனையில் சேர்த்து தீவிரமாக கண்காணித்து வருகின்றனர்.

கொரோனா நோயால் பாதிக்கப்பட்டவர் இறந்த சம்பவம் விழுப்புரம் நகரம் மட்டுமின்றி மாவட்டம் முழுவதும் உள்ள பொதுமக்களிடையே பெரும் அச்சத்தையும், பரபரப்பையும் ஏற்படுத்தியுள்ளது. இவரோடு சேர்த்து மாவட்டத்தில் கொரோனா நோயால் பலியானவர்களின் எண்ணிக்கை 2 ஆக உயர்ந்துள்ளது. மேலும் தமிழகத்தில் இதுவரை கொரோனா நோயால் பலியானவர்களின் எண்ணிக்கை 15 ஆக உயர்ந்துள்ளது என்பது குறிப்பிடத்தக்கது.

தமிழகத்தில் கொரோனா வைரஸ் பாதிப்பு எண்ணிக்கை 1,267 ஆக உயர்ந்துள்ளதாகவும், கன்னியாகுமரி அரசு மருத்துவமனையில் கொரோனா பாதிப்பை கண்டுபிடிக்க புதிய பரிசோதனை மையம் அமைக்கப்பட்டுள்ளதாகவும் சுகாதாரத்துறை தெரிவித்துள்ளது.

இதுகுறித்து தமிழக சுகாதாரத்துறை கொரோனா பாதிப்பு குறித்து வெளியிட்ட செய்திக்குறிப்பில் கூறப்பட்டிருப்பதாவது:-

நேற்று ஒரே நாளில் 25 பேர் கொரோனா நோய் தொற்றால் பாதிக்கப்பட்டுள்ளனர். இதன் மூலம் தமிழகத்தில் கொரோனா பாதித்தவர்களின் எண்ணிக்கை 1,267 ஆக உயர்ந்துள்ளது.

தமிழக மருத்துவமனையில் கொரோனா வைரசால் பாதிக்கப்பட்டு சிகிச்சை பெற்றவர்களில் இதுவரை 180 பேர் ‘டிஸ்சார்ஜ்’ செய்யப்பட்டுள்ளனர். இதில் நேற்று ஒரே நாளில் 62 பேர் ‘டிஸ்சார்ஜ்’ செய்யப்பட்டுள்ளனர்.

தமிழகத்தில் நேற்று கொரோனாவால் பாதிக்கப்பட்ட 25 பேரில், நாமக்கல் மாவட்டத்தில் 5 பேரும், சென்னை, மதுரை, வேலூர் மற்றும் ராமநாதபுரம் ஆகிய மாவட்டங்களில் தலா 3 பேரும், சேலம் மாவட்டத்தில் 2 பேரும், கோவை, திருப்பூர், நெல்லை, திருவள்ளூர், விழுப்புரம் மற்றும் தஞ்சாவூர் ஆகிய மாவட்டங்களில் தலா ஒருவரும் புதிதாக கொரோனாவால் பாதிக்கப்பட்டுள்ளனர்.

இவ்வாறு அதில் கூறப்பட்டுள்ளது.