கொரோனா தொற்றால் அரிசி ஆலை அதிபர் பலி: விழுப்புரம் பானாம்பட்டு பகுதிக்கு ‘சீல்’ - மருத்துவ குழுவினர் முகாமிட்டு பொதுமக்களுக்கு பரிசோதனை

விழுப்புரம்,

விழுப்புரம் பானாம்பட்டில் கொரோனா தொற்றினால் பாதிக்கப்பட்டு அரிசி ஆலை அதிபர் ஒருவர் இறந்துள்ளதால் அவர் வசித்து வந்த பகுதி தடை செய்யப்பட்டதோடு, தனிமைப்படுத்தப்பட்ட பகுதியாகவும் மாவட்ட நிர்வாகம் அறிவித்துள்ளது. அந்த பகுதிக்குள் வெளிநபர்கள் யாரும் உள்ளே செல்லாதவாறும், அதுபோல் அப்பகுதியை சேர்ந்த யாரும் அங்கிருந்து வெளியே வராமல் இருக்கும் வகையிலும் அங்குள்ள பிரதான சாலைகளை போலீசார், பேரிகார்டுகள் மூலம் தடுப்பு அமைத்து அப்பகுதிகளுக்கு ‘சீல்’ வைத்துள்ளனர். மேலும் அந்த பகுதியில் இருந்து யாரும் வெளியே செல்கிறார்களா? என்றும் வெளிநபர்கள் யாரும் உள்ளே வருகிறார்களா? என்பதை கண்காணிக்க போலீசார் அடங்கிய சிறப்பு குழுக்கள் அமைக்கப்பட்டு அவர்கள் 24 மணி நேரமும் தீவிரமாக கண்காணித்து வருகின்றனர்.

இப்பகுதியை மாவட்ட போலீஸ் சூப்பிரண்டு ஜெயக்குமார் பார்வையிட்டு ஆய்வு மேற்கொண்டார். அப்போது பொதுமக்கள் யாரும் அத்தியாவசிய பொருட்களை வாங்க வீடுகளை விட்டு வெளியே வர வேண்டாம். சமூக இடைவெளியை கடைபிடிக்க வேண்டும். கட்டாயம் முக கவசம் அணிய வேண்டும். கைகளையும் அவ்வப்போது கிருமி நாசினி அல்லது சோப்பு போட்டு நன்கு கழுவ வேண்டும் என்றும், அத்தியாவசிய பொருட்கள் தடையின்றி கிடைக்க மாவட்ட நிர்வாகம் ஏற்பாடு செய்யும் என்று அறிவுறுத்தினார்.

அதோடு அந்த பகுதியில் 24 மணி நேரமும் போலீசார் பாதுகாப்பு பணியில் இருக்க வேண்டும். வெளியாட்கள் யாரையும் உள்ளே அனுமதிக்கக்கூடாது என்று போலீசாருக்கு உத்தரவிட்டார்.

மேலும் அப்பகுதி முழுவதும் கிருமி நாசினி தெளிக்கப்பட்டு சுத்தம் செய்யும் பணிகள் நடந்து வருகிறது. அதுமட்டுமின்றி அப்பகுதியில் நேற்று மருத்துவ குழுவினர் முகாமிட்டு அங்குள்ள மக்களை அவரவர் வீடுகளிலேயே தனிமைப்படுத்தி வீடு, வீடாக சென்று அவர்களில் யார், யாருக்கெல்லாம் காய்ச்சல், சளி, இருமல் போன்ற தொந்தரவுகள் இருக்கிறது என்று கண்காணித்து, அவர்களுக்கு உமிழ்நீர், ரத்தம் பரிசோதனை செய்து வருகின்றனர்.