துரித உபகரணங்கள் மூலம் திருச்சி அரசு மருத்துவமனையில் முதல்கட்டமாக 15 பேருக்கு கொரோனா பரிசோதனை

திருச்சி,

கொரோனா வைரஸ் தொற்றை 30 நிமிடங்களில் கண்டறியும் துரித பரிசோதனை உபகரணங்கள் நேற்று திருச்சி அரசு மருத்துவமனைக்கு வந்தன. முதல்கட்டமாக 15 பேருக்கு பரிசோதனை மேற்கொள்ளப்பட்டது.

துரித பரிசோதனை

திருச்சி மாவட்டத்தில் கொரோனா வைரஸ் பாதிப்புக்குள்ளானவர்கள் அரசு மருத்துவமனையில் உள்ள தனி வார்டில் அனுமதிக்கப்பட்டு சிகிச்சை பெற்று வருகிறார்கள். கடந்த 2 நாட்களுக்கு முன்பு திருச்சி அரசு மருத்துவமனையில் கொரோனாவால் பாதிக்கப்பட்டு சிகிச்சை பெற்று வந்த 32 பேர் குணம் அடைந்து வீடு திரும்பினர். மீதம், 17 பேர் கொரோனா தொற்று உறுதி செய்யப்பட்டு சிகிச்சையில் இருந்து வருகிறார்கள்.

இந்தநிலையில் கொரோனா அறிகுறியுடன் அரசு மருத்துவமனைக்கு வருபவர்களுக்கு இதுவரை ரத்த மாதிரி, சளி ஆகியவை பரிசோதனைக்கு எடுக்கப்பட்டு சோதனை நடத்தப்பட்டது. அதன் முடிவுகள் தெரிய 4 முதல் 5 நாட்கள் ஆனது. இதனால் முடிவுகள் வரும்வரை அவர்கள் அரசு மருத்துவமனையிலேயே கண்காணிப்பில் வைக்கப்பட்டு இருந்தனர். இந்தநிலையில் கொரோனா வைரஸ் தொற்று உள்ளதா? என்பதை 30 நிமிடங்களில் கண்டறியும் துரித பரிசோதனை உபகரணங்கள் (ரேபிட் டெஸ்ட் கிட்) முதல்கட்டமாக 1000 நேற்று திருச்சி அரசு மருத்துவமனைக்கு வந்தன.

15 பேருக்கு பரிசோதனை

இந்த உபகரணங்களின் மூலம் முதல் கட்டமாக நேற்று அரசு மருத்துவமனையில் கொரோனா வார்டில் பணிபுரியும் டாக்டர்கள், நர்சுகள் மற்றும் காவல்துறையை சேர்ந்த 15 பேருக்கு பரிசோதனை மேற்கொள்ளப்பட்டது. இதில் யாருக்கும் கொரோனா வைரஸ் நோய் தொற்று இல்லை என்பது தெரியவந்தது. அப்போது மாவட்ட கலெக்டர் சிவராசு, அரசு மருத்துவமனை டீன் வனிதா, கண்காணிப்பாளர் ஏகநாதன் மற்றும் பலர் உடன் இருந்தனர்.