பெண்ணிடம் ஆபாசமாக பேசிய ஐ.ஆர்.பி.என். போலீஸ் அதிகாரி பணியிடை நீக்கம்

திருபுவனை,

கொரோனா தடுப்பு நடவடிக்கையில் புதுவை மாநில எல்லைகள் மற்றும் முக்கிய பகுதிகளில் பொதுமக்கள் நடமாட்டத்தை கட்டுப்படுத்த போலீசார் பாதுகாப்பு பணியில் ஈடுபட்டு வருகின்றனர். அவர்களுடன் இணைந்து ஐ.ஆர்.பி.என். போலீசார், ஊர்க்காவல் படையினர், மகளிர் போலீசாரும் பணியாற்றி வருகின்றனர். அவர்களை அதிகாரிகள் கண்காணித்து வருகிறார்கள்.

அந்த வகையில் திருபுவனை பகுதி கண்காணிப்பு அதிகாரியாக ஐ.ஆர்.பி.என். துணை கமாண்டன்ட் சுபாஷ் (வயது 39) நியமிக்கப்பட்டார். திருபுவனை போலீஸ் நிலையத்துக்கு சென்ற அவர் அங்கு பணியில் இருந்த ஊர்க்காவல் படையை சேர்ந்த பெண் ஒருவரிடம் ஆபாசமாக பேசியதாக கூறப்படுகிறது.

இதுகுறித்து அந்த பெண் முறையிட்டதையடுத்து போலீஸ் டி.ஜி.பி. பாலாஜி ஸ்ரீவஸ்தவா உத்தரவின்பேரில் போலீஸ் சூப்பிரண்டு ரங்கநாதன் மேற்பார்வையில் இன்ஸ்பெக்டர் கணேசன் விசாரணை நடத்தினார். இதில் அந்த பெண்ணிடம் துணை கமாண்டன்ட் சுபாஷ், ஆபாசமாக பேசியது உறுதியானது. இதையடுத்து 4 பிரிவுகளின் கீழ் வழக்குப்பதிவு செய்து சுபாசை போலீசார் கைது செய்தனர்.

இதையடுத்து அவரை பணியிடை நீக்கம் செய்து கவர்னர் கிரண்பெடி நேற்று உத்தரவிட்டார்.