கரூர் அருகே தனியார் பள்ளி ஆசிரியர் தற்கொலை காதல் மனைவி வீட்டிற்கு வராததால் விபரீத முடிவு

கரூர், 

கரூர் அருகே தாய் வீட்டிற்கு சென்ற காதல் மனைவி வீட்டிற்கு வராததால் தனியார் பள்ளி ஆசிரியர் தற்கொலை செய்து கொண்டார். இதுகுறித்து போலீசார் விசாரணை நடத்தி வருகின்றனர்.

உடற்பயிற்சி ஆசிரியர்

கரூர் அருகே உள்ள மண்மங்கலம் அண்ணாநகர் பகுதியை சேர்ந்தவர் நாகராஜ். இவருடைய மகன் சுபாஷ் ( வயது 25). தனியார் பள்ளியில் உடற்பயிற்சி ஆசிரியராக பணியாற்றி வந்தார். இவர் சர்மிளா (25) என்பவரை காதலித்து, கடந்த 50 நாட்களுக்கு முன்பு திருமணம் செய்து கொண்டார். இதனையடுத்து சுபாசின் வீட்டில் தங்கி குடும்பம் நடத்தி வந்தனர்.

இந்தநிலையில் கடந்த சில நாட்களுக்கு முன்பு தனது பெற்றோர் வீட்டிற்கு சென்று விட்டு வருவதாக கூறி விட்டு சர்மிளா சென்றுள்ளார். பின்னர் தாய் வீட்டிற்கு சென்ற அவர் மீண்டும் வீட்டிற்கு வர வில்லை. சுபாஷ் வீட்டிற்கு வரச் சொல்லி அழைத்தும் சர்மிளா வரவில்லையாம். இதனால் மனமுடைந்த சுபாஷ் வீட்டில் தூக்குப்போட்டு தற்கொலை செய்து கொள்ள முயன்றுள்ளார்.

தற்கொலை

இதைக்கண்ட உறவினர்கள் அவரை மீட்டு சிகிச்சைக்காக கரூர் அரசு மருத்துவக்கல்லூரி மருத்துவமனைக்கு அனுப்பி வைத்தனர். அங்கு அவரை பரிசோதித்த டாக்டர்கள் சுபாஷ் ஏற்கனவே இறந்து விட்டதாக தெரிவித்தனர். இந்த தற்கொலை சம்பவம் குறித்து வாங்கல் போலீஸ் நிலையத்தில் புகார் அளிக்கப்பட்டது.

புகாரின்பேரில் வாங்கல் போலீஸ் சப்-இன்ஸ்பெக்டர் பொன்னுசாமி வழக்குப்பதிவு செய்து விசாரணை நடத்தி வருகிறார். திருமணம் ஆன சில நாட்களிலேயே புதுமாப்பிள்ளை இறந்தது அப்பகுதியில் சோகத்தை ஏற்படுத்தி உள்ளது.