பெண்ணாடம் அருகே, தி.மு.க. பிரமுகர் உள்பட 3 பேர் வீட்டில் நகை-பணம் திருட்டு

பெண்ணாடம், 

கடலூர் மாவட்டம் பெண்ணாடம் அடுத்த கோனூர் கிராமத்தை சேர்ந்தவர் மதியழகன்(வயது 62). இவர் கடலூர் மாவட்ட தி.மு.க. விவசாய தொழிலாளர் அணி அமைப்பாளர் ஆவார்.

இவருடைய தம்பி இளவரசன், தம்பி மகன் ராஜவேல் ஆகியோரின் வீடுகளும் அரு கருகிலேயே உள்ளது. இந்த நிலையில் நேற்று முன்தினம் இரவு மதியழகன் உள்ளிட்ட 3 குடும்பத்தினரும் தங்களது வீட்டின் முன்புறம் படுத்து தூங்கினர். இந்த நிலையில் நேற்று காலையில் மதியழகன் குடும்பத்தினர் வீட்டுக்குள் சென்று பார்த்தபோது வீட்டின் பின்பக்க சுவரில் துளையிடப்பட்டு இருந்தது. மேலும் வீட்டில் இருந்த பீரோவும் திறந்து கிடந்தது. இதனால் அதிர்ச்சியடைந்த அவர் பீரோவை பார்த்த போது அதில் இருந்த நகை-பணத்தை காணவில்லை. இதேபோல் இளவரசன், ராஜவேல் ஆகியோரது வீட்டின் பின்பக்க சுவர்களிலும் துளையிடப்பட்டு பீரோவில் இருந்த நகை-பணம் திருடப்பட்டிருந்தது. பின்னர் இதுகுறித்து போலீசாருக்கு தகவல் தெரிவிக்கப்பட்டது.

அதன்பேரில் பெண்ணாடம் போலீசார் சம்பவ இடத்துக்கு விரைந்து வந்து திருட்டு நடந்த வீடுகளை பார்வையிட்டு அவர்களது குடும்பத்தினரிடம் விசாரித்தனர். விசாரணையில் மதியழகன், இளவரசன், ராஜவேல் ஆகியோரின் 3 குடும்பத்தினரும் எப்போதும் வீட்டின் முன்பு தூங்குவதை வழக்கமாக வைத்திருப்பதை நோட்டமிட்ட மர்மநபர்கள் நள்ளிரவில் பின்பக்க சுவர்களை துளையிட்டு 3 பேரின் வீடுகளில் இருந்த 12 பவுன் நகை, ரூ.10 ஆயிரம், 1 கிலோ வெள்ளி விளக்குகள், விலையுயர்ந்த செல்போன், கைக்கடிகாரங்கள் ஆகியவற்றை கொள்ளையடித்து சென்று இருப்பது தெரியவந்தது.

இதற்கிடையே கைரேகை நிபுணர்கள் வரவழைக்கப்பட்டு வீட்டில் இருந்த தடயங்களை சேகரித்து சென்றனர். மேலும் இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

ஒரே நாளில் 3 வீடுகளில் நகை-பணம் கொள்ளையடிக்கப்பட்ட சம்பவம் அப்பகுதியில் பரபரப்பை ஏற்படுத்தி உள்ளது.