போலீஸ்காரருக்கு கொரோனா தொற்று: குனியமுத்தூர் போலீஸ் நிலையம் மூடப்பட்டது

கோவை,

ஊரடங்கு பாதுகாப்பு பணியை மேற்கொண்ட கோவை நகர தெற்கு பகுதியை சேர்ந்த 6 போலீசாருக்கு கொரோனா தொற்று உறுதி செய்யப்பட்டு உள்ளது. இதில் 3 பேர் போத்தனூர் போலீஸ் நிலையத்தில் பணிபுரிபவர்கள். இவர்களுக்கு தொற்று உறுதி செய்யப்பட்டதன் காரணமாக அங்கு பணியாற்றிய காவலர்கள் தங்களை தனிமைப்படுத்திக் கொள்ள வலியுறுத்தப்பட்டு உள்ளது.

மேலும், போத்தனூர் போலீஸ் நிலையம் சீல் வைக்கப்பட்டது. இதையடுத்து மகாலிங்கபுரம் பகுதியில் உள்ள திருமண மண்டபத்தில் போத்தனூர் போலீஸ் நிலையம் தற்காலிகமாக செயல்படுகிறது. 6 போலீஸ்காரர்களில் ஒருவர் குனியமுத்தூர் போலீஸ் நிலையத்தில் பணியாற்றியவர். ஒருவர் ஆயுதப்படை, ஒருவர் போக்குவரத்து புலனாய்வு பிரிவில் பணியாற்றியவர்கள்.

குனியமுத்தூர் போலீஸ்நிலையத்தில் பணியாற்றிய போலீஸ்காரருக்கு கொரோனா பாதிப்பு ஏற்பட்டதால், அந்த போலீஸ் நிலையம் மாநகர் போலீஸ் கமிஷனர் உத்தரவுப்படி நேற்று மூடப்பட்டது. தற்போது குனியமுத்தூர் போலீஸ்நிலையம் கோவைப்புதூர் பிரிவில் உள்ள குமரன் மகாலில் தற்காலிகமாக செயல்படுகின்றது. அங்கு பணியாற்றிய 60 போலீஸ்காரர்களுக்கும் நேற்று கொரோனா மருத்துவ பரிசோதனை நடைபெற்றது.

கொரோனா தொற்று காரணமாக போத்தனூர் போலீஸ் நிலையத்தை தொடர்ந்து போலீஸ் நிலையமும் மூடப்பட்டது பெரும் பரபரப்பை ஏற்படுத்தி உள்ளது.