வாகன அனுமதிக்கு ஆன்லைனில் விண்ணப்பிக்கலாம்: கிருஷ்ணகிரி மாவட்ட கலெக்டர் பிரபாகர் தகவல்

கிருஷ்ணகிரி, 

அத்தியாவசிய பணிக்கு செல்பவர்கள் வாகன அனுமதிக்கு ஆன்லைன் மூலம் மட்டுமே விண்ணப்பிக்க வேண்டும் என கிருஷ்ணகிரி மாவட்ட கலெக்டர் பிரபாகர் தெரிவித்துள்ளார்.

இது குறித்து அவர் வெளியிட்டுள்ள செய்திக்குறிப்பில் கூறியிருப்பதாவது:-

கிருஷ்ணகிரி மாவட்டத்தில் கொரோனா தடுப்பு நடவடிக்கைகள் முழுவீச்சில் செயல்படுத்தப்பட்டு வருகிறது. மேலும் மாவட்டத்தில் தற்போது 144 தடை உத்தரவு அமலில் உள்ளது. 144 தடை உத்தரவிற்கு முன்பே நிச்சயிக்கப்பட்ட திருமணத்தில் கலந்து கொள்ள அவருடைய நெருங்கிய ரத்த சொந்தங்கள், அதே போல் இறந்த நபர்களின் இறுதி சடங்கிற்கு ரத்த உறவு சம்பந்தப்பட்ட உறவினர்கள் மற்றும் அவசர மருத்துவ சிகிச்சைக்கு செல்லுதல் ஆகிய அத்தியாவசிய தேவைக்கு மட்டுமே, அத்தியாவசிய பயணசீட்டு அனுமதி வழங்கப்பட்டு வருகிறது.

பொதுமக்கள் மேற்குறிப்பிட்ட அத்தியாவசிய பயன்பாட்டிற்கு மட்டும் ஆன்லைன் மூலம் வாகன அனுமதிக்கு விண்ணப்பிக்கலாம்.

மேலும், தமிழக அரசு ஆணையில் குறிப்பிட்டுள்ளபடி, அத்தியாவசிய பொருட்கள் உற்பத்தி பணியில் ஈடுபடும் நிறுவனங்கள் உற்பத்தி பணியில் ஈடுபட மாவட்ட நிர்வாகத்திடம் அனுமதி பெறுதவற்கு mhs-k-gi@gm-a-il.com என்ற மின்னஞ்சல் முகவரியில் உரிய ஆவணங்களுடன் விண்ணப்பிக்க வேண்டும். தங்கள் மனுவின் மீது உரிய நடவடிக்கை மேற்கொள்ளப்பட்டு, அதற்கான உத்தரவு நகல் தங்கள் இ-மெயில் முகவரிக்கு அனுப்பி வைக்கப்படும்.

பொதுமக்கள் மற்றும் நிறுவனங்கள் தங்கள் மனுக்கள் மீதான நடவடிக்கை குறித்து அறிந்து கொள்ள மாவட்ட கலெக்டர் அலுவலகத்தில் செயல்படும் கட்டுப்பாட்டு அறை எண்கள் 04343-230041, 04343-234444 மற்றும் 1077 என்ற கட்டணமில்லா தொலைபேசி எண்கள் மூலமாகவும், mhs-k-gi@gm-a-il.com, dmt-a-hs-i-l-d-a-r-k-gi@gm-a-il.com ஆகிய மின்னஞ்சல் மூலமாகவும் தெரிந்துக்கொள்ளலாம். பொதுமக்கள் 144 தடையை மீறி மாவட்ட கலெக்டர் அலுவலகத்திற்கு நேரில் வரக்கூடாது எனவும், அனுமதியின்றி வெளியே வரும் நபர்கள் மீது வழக்குப்பதிவு செய்து, வாகனங்கள் பறிமுதல் செய்யப்படும் எனவும் தெரிவித்துக்கொள்கிறேன் என்று அதில் கூறப்பட்டுள்ளது.