நாமக்கல் மாவட்டத்தில் 5 மாத ஆண் குழந்தை உள்பட 4 பேருக்கு கொரோனா தொற்று: பாதிப்பு எண்ணிக்கை 59 ஆக உயர்வு

நாமக்கல், 

நாமக்கல் மாவட்டத்தில் இதுவரை 55 பேர் கொரோனா வைரசால் பாதிக்கப்பட்டு கரூர் மற்றும் சேலம் அரசு மருத்துவக்கல்லூரி மருத்துவமனைகளில் சிகிச்சை பெற்று வந்தனர். இவர்களில் 45 பேர் குணமாகி வீடு திரும்பி விட்டனர். மீதமுள்ள 10 பேருக்கு தொடர்ந்து சிகிச்சை அளிக்கப்பட்டு வருகிறது.

இதற்கிடையே நேற்று புதிதாக காளப்பநாயக்கன்பட்டியை சேர்ந்த 5 மாத ஆண்குழந்தை உள்பட ஒரே குடும்பத்தை சேர்ந்த 4 பேருக்கு கொரோனா தொற்று உறுதி செய்யப்பட்டு உள்ளது. இதில் குழந்தையின் 25 வயது நிரம்பிய தாயார், 26 வயது நிரம்பிய தந்தை மற்றும் 48 வயது பாட்டி ஆகியோர் இடம்பெற்று உள்ளனர். இவர்கள் ஏற்கனவே கொரோனா தொற்றால் பாதிக்கப்பட்டு, சேலம் அரசு மருத்துவ கல்லூரி மருத்துவமனையில் சிகிச்சை பெற்று வரும் இன்சூரன்ஸ் ஊழியரின் பக்கத்து வீட்டில் வசித்து வருகிறார்கள். இவர்கள் 4 பேரும் கரூர் அரசு மருத்துவக்கல்லூரி மருத்துவமனையில் சேர்க்கப்பட்டு சிகிச்சை பெற்று வருகின்றனர்.

இதனால் நாமக்கல் மாவட்டத்தில் கொரோனா தொற்றால் பாதிக்கப்பட்ட நபர்களின் எண்ணிக்கை 59 ஆக உயர்ந்து உள்ளது. நாமக்கல் மாவட்டத்தில் ஏற்கனவே கொரோனா தொற்றால் பாதிக்கப்பட்ட நபர்களின் குடும்பத்தினர் மற்றும் உறவினர்கள் 729 பேர் வீடுகளில் தனிமைப்படுத்தப்பட்டு கண்காணிக்கப்பட்டு வருகின்றனர்.

இதேபோல் 10 பேர் அரசு ஆஸ்பத்திரிகளில் கண்காணிக் கப்பட்டு வருகின்றனர். இதுதவிர வெளிமாநிலம் சென்று திரும்பிய 3,200 பேரும் வீடுகளில் தனிமைப்படுத்தப்பட்டு கண்காணிக்கப்பட்டு வருகின்றனர். புதிதாக தொற்று கண்டறியப்பட்ட நபர்களின் குடும்பத்தினர் மற்றும் உறவினர்களை தனிமைப்படுத்தவும், ரத்த மாதிரிகள் எடுத்து பரிசோதனை நடத்தவும் சுகாதாரத்துறை அதிகாரிகள் முயற்சி மேற்கொண்டு வருகின்றனர். நாமக்கல் மாவட்டத்தில் நாளுக்கு நாள் கொரோனா பாதிப்பு அதிகரித்து வருவதால் பொதுமக்கள் அச்சம் அடைந்து உள்ளனர்.