களக்காடு அருகே ஊரடங்கில் விபத்து பாலத்தில் மோட்டார் சைக்கிள் மோதல்; 2 நண்பர்கள் பலி

களக்காடு, 

களக்காடு அருகே பாலத்தில் மோட்டார்சைக்கிள் மோதிய விபத்தில் 2 நண்பர்கள் பரிதாபமாக இறந்தனர்.

பாலத்தில் மோதல்

நெல்லை மாவட்டம் களக்காடு அருகே உள்ள கோவில்பத்தை சேர்ந்தவர் தேவசகாயம் மகன் கிளிண்டன் (வயது 25). இவர் என்ஜினீயரிங் படித்து வந்தார். பின்னர் படிப்பை பாதியில் நிறுத்தி விட்டு விவசாயம் செய்து வந்தார். அவருடைய நண்பர் ஊச்சிக்குளத்தை சேர்ந்த ரவிராஜ் மகன் பசுபதி (24).

இவர்கள் இருவரும் நேற்று முன்தினம் நள்ளிரவு களக்காட்டில் இருந்து சூரங்குடி செல்லும் மங்கம்மாள் சாலையில் மோட்டார்சைக்கிளில் சென்றனர். மோட்டார்சைக்கிளை கிளிண்டன் ஓட்டினார். சூரங்குடி கால்வாய் மீதுள்ள பாலத்தில் சென்றபோது மோட்டார்சைக்கிள் திடீர் என நிலை தடுமாறி பாலத்தின் தடுப்பு சுவர் மீது மோதியது.

நண்பர்கள் சாவு

இதில் ரோட்டில் தூக்கி வீசப்பட்டு பலத்த காயம் அடைந்த கிளிண்டன், பசுபதி ஆகிய இருவரும் ரத்த வெள்ளத்தில் சம்பவ இடத்திலேயே உயிரிழந்தனர். மோதிய வேகத்தில் கால்வாய்க்குள் மோட்டார்சைக்கிள் பாய்ந்தது. தற்போது ஊரடங்கு நேரம் என்பதால் அந்த சாலையில் போக்குவரத்து இல்லை. நேற்று பகல் அந்த வழியாக சென்ற சிலர், 2 பேர் பிணமாக கிடப்பது குறித்து களக்காடு போலீசாருக்கு தகவல் கொடுத்தனர்.

இதையடுத்து நாங்குநேரி துணை போலீஸ் சூப்பிரண்டு இளங்கோவன் தலைமையில், களக்காடு இன்ஸ்பெக்டர் மேரிஜெமிதா, சப்-இன்ஸ்பெக்டர்கள் அருண்ராஜா, பழனி மற்றும் போலீசார் சம்பவ இடத்திற்கு சென்றனர். 2 பேரின் உடல்களையும் கைப்பற்றி பிரேத பரிசோதனைக் காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர். ஊரடங்கு நேரத்தில் நடந்த இந்த விபத்து குறித்து போலீசார் வழக்குப்பதிவு செய்தனர்.

தந்தை போலீசில் புகார்

இதற்கிடையே, பசுபதியின் தந்தை ரவிராஜ், தனது மகனின் சாவில் சந்தேகம் இருப்பதாக களக்காடு போலீஸ் நிலையத்தில் புகார் செய்தார். அதன்பேரில் போலீசார் விசாரணை நடத்தி வருகின்றனர்.