குடும்ப தகராறில் விபரீதம்: கணவன் கண்முன்னே கிணற்றில் குதித்து கர்ப்பிணி தற்கொலை

முசிறி, 

கணவன் கண்முன்னே கிணற்றில் குதித்து கர்ப்பிணி தற்கொலை செய்து கொண்டார்.

கிணற்றில் குதித்தார்

முசிறியை அடுத்த டி.புதுப்பட்டி கீழத்தெரு பகுதியில் வசித்து வருபவர் சஞ்சீவராஜ் (வயது 29). லாரி டிரைவரான இவருக்கு, திருமணமாகி 6 மாதங்கள் ஆகிறது. இவரது மனைவி ரக்‌ஷனா (22) தற்போது கர்ப்பமாக உள்ளதாக தெரிகிறது. கணவன், மனைவி இடையே அடிக்கடி குடும்ப தகராறு ஏற்பட்டு வந்தது. இதனால் மனமுடைந்த நிலையில் இருந்த ரக்‌ஷனா, தனது தாய் வீட்டிற்கு செல்லவேண்டும் என்று கூறி கணவருடன் மோட்டார் சைக்கிளில் சென்றுள்ளார்.

முசிறி சுக்காம்பட்டி மெயின்ரோடு அருகே சென்றபோது, தனது தாய் தனலட்சுமி நிற்பதை கண்ட ரக்‌ஷனா, மோட்டார் சைக்கிளில் இருந்து இறங்கி உள்ளார். பின்னர் அவர் திடீரென கணவன் கண் முன்னே அருகில் உள்ள கிணற்றுக்குள் குதித்துள்ளார். இதனைக்கண்ட தனலட்சுமி, மகளை காப்பாற்ற ஓடிவந்து, அவரும் கிணற்றுக்குள் குதித்துள்ளார். இதையடுத்து அக்கம் பக்கத்தினர் ஓடிவந்து, கிணற்றுக்குள் இறங்கி தனலட்சுமியை மீட்டனர். ஆனால் ரக்‌ஷனா கிணற்று நீரில் மூழ்கி இறந்தார்.

கணவன்-மாமியார் கைது

இதுகுறித்து தகவலறிந்ததும் முசிறி, துறையூர் தீயணைப்பு நிலைய வீரர்கள் வந்து கிணற்றுக்குள் மூழ்கி பலியான ரக்‌ஷனா உடலை மீட்ட னர். முசிறி போலீஸ் இன்ஸ்பெக்டர் பால்ராஜ் மற்றும் போலீசார் ரக்‌ஷனா உடலை கைப்பற்றி முசிறி அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.

இந்த சம்பவம் குறித்து தனலட்சுமி அளித்த புகாரின்பேரில், முசிறி போலீசார் வழக்குப்பதிந்து சஞ்சீவராஜ், அவரது தாயார் பாப்பாத்தி (50) ஆகிய இருவரையும் கைதுசெய்து, விசாரணை நடத்தி வருகின்றனர். ரக்‌ஷனாவுக்கு திருமணமாகி 6 மாதங்களே ஆவதால் முசிறி சப்-கலெக்டர் பத்மஜாவும் விசாரணை நடத்தி வருகிறார்.