சிதம்பரம் அருகே பயங்கரம் காவலாளி அரிவாளால் வெட்டிக்கொலை

அண்ணாமலைநகர்,

கடலூர் மாவட்டம் சிதம்பரம் அருகே உள்ள அம்மாபேட்டை ராஜீவ்காந்தி நகரை சேர்ந்தவர் நடராஜன்(வயது 55). இவருடைய மனைவி சரஸ்வதி. இந்த தம்பதிக்கு ஒரு மகன், ஒரு மகள் உள்ளனர். அம்மாபேட்டையில் உள்ள ஒரு வணிக வளாகத்தில் கடந்த 10 ஆண்டுகளாக இரவு நேர காவலாளியாக நடராஜன் பணியாற்றி வந்தார்.

இந்த நிலையில் நேற்று அதிகாலையில் அந்த வணிக வளாகம் எதிர்ப்புறத்தில் உள்ள கான்சாகிப் வாய்க்கால் கரையோரத்தில் மர்மமான முறையில் நடராஜன் இறந்து கிடந்தார். அவரது தலை, கழுத்து, முழங்கால் உள்ளிட்ட உடல் முழுவதும் 15-க்கும் மேற்பட்ட இடங்களில் அரிவாளால் வெட்டப்பட்ட காயங்கள் இருந்தன. இதை பார்த்து அதிர்ச்சி அடைந்த அப்பகுதி மக்கள், அண்ணாமலைநகர் போலீஸ் நிலையத்துக்கு தகவல் தெரிவித்தனர்.

போலீசார் விசாரணை

அதன்பேரில் சிதம்பரம் துணை போலீஸ் சூப்பிரண்டு (பொறுப்பு) சுந்தரம், போலீஸ் இன்ஸ்பெக்டர் தேவேந்திரன் மற்றும் போலீசார் சம்பவ இடத்திற்கு விரைந்து சென்று, நடராஜனின் உடலை பார்வையிட்டு அப்பகுதி மக்களிடம் விசாரணை நடத்தினர். பின்னர் அவரது உடலை கைப்பற்றி பிரேத பரிசோதனைக்காக சிதம்பரம் அரசு மருத்துவமனைக்கு அனுப்பி வைத்தனர்.

இது பற்றி தகவல் அறிந்ததும் கடலூர் மாவட்ட போலீஸ் சூப்பிரண்டு ஸ்ரீஅபிநவ் நேரில் வந்து, நடராஜன் இறந்து கிடந்த இடத்தை பார்வையிட்டார். இதற்கிடையில் விழுப்புரம் மண்டல தடயவியல் துணை இயக்குனர் சண்முகம் நேரில் வந்து தடயங்களை சேகரித்தார்.

காரணம் என்ன?

நடராஜனின் உடல் அருகில் மீன் பிடிக்கும் வலை கிடந்தது. இதனால் கான்சாகிப் வாய்க்காலில் மீன்பிடிப்பதில் ஏற்பட்ட தகராறில் அவர் வெட்டிக்கொலை செய்யப்பட்டாரா? அல்லது வேறு ஏதேனும் காரணத்தால் நடராஜன் வெட்டிக்கொலை செய்யப்பட்டாரா? என்பது குறித்து போலீசார் விசாரணை நடத்தி வருகின்றனர்.

கொரோனா வைரஸ் பரவலை தடுக்க ஊரடங்கு அமலில் உள்ள சமயத்தில் காவலாளி வெட்டிக்கொலை செய்யப்பட்ட சம்பவம் சிதம்பரம் பகுதியில் பெரும் பரபரப்பை ஏற்படுத்தி உள்ளது.