டிரோன் மூலம் நடத்திய தேடுதல் வேட்டை: முந்திரித்தோப்பில் சாராயம் காய்ச்சிய பெண் கைது

பண்ருட்டி,

பண்ருட்டி பகுதியில் உள்ள முந்திரித்தோப்புகளில் சாராயம் காய்ச்சி விற்பனை செய்யப்படுவதாக, ‘தினத்தந்தி’யில் செய்தி வெளியிடப்பட்டது. இதையடுத்து மாவட்ட போலீஸ் சூப்பிரண்டு ஸ்ரீஅபிநவ் உத்தரவின் பேரில் சாராயம் காய்ச்சுபவர்களை கண்டறிந்து கைது செய்யும் நடவடிக்கையில் போலீசார் ஈடுபட்டுள்ளனர்.

இந்த நிலையில் காடாம்புலியூர் போலீஸ் சரகத்துக்கு உட்பட்ட சிறுதொண்டமாதேவி கிராமத்தில் உள்ள முந்திரித்தோப்புகளில் மாவட்ட கலால் பிரிவு துனை போலீஸ் சூப்பிரண்டு ஸ்ரீதரன், பண்ருட்டி மதுவிலக்கு அமல்பிரிவு இன்ஸ்பெக்டர் தாரகேஸ்வரி, தொழில்நுட்ப பிரிவு ஆய்வாளர் ரவிக்குமார் மற்றும் போலீசார், டிரோன் கேமரா மூலமாக சோதனை நடத்தினர்.

பெண் கைது

அப்போது, முந்திரித் தோப்பில் மோட்டார் சைக்கிள் ஒன்று இருந்ததை அடையாளம் கண்டு, அதை நோக்கி டிரோன் கேமராவை செலுத்தியபோது அங்கு பதுங்கியிருந்த ஒருவர் தப்பி ஓடிவிட்டார். பின்னர் போலீசார் அந்த இடத்தை சோதனை செய்தனர். அதில், 15 லிட்டர் சாராயம், 20 லிட்டர் முந்திரி பழ ஊறல் பள்ளம் தோண்டி வைக்கப்பட்டு இருந்ததை கண்டுபிடித்தனர்.

இவற்றை கைப்பற்றி போலீசார் மேற்கொண்ட விசாரணையில், அதே ஊரை சேர்ந்த அறிவழகன்(வயது 48) மற்றும் அவரது மனைவி லட்சுமி வயது( 42) ஆகியோர் சாராயம் காய்ச்சி விற்பனை செய்தது தெரியவந்தது. இது தொடர்பாக லட்சுமி கைது செய்யப்பட்டார். தலைமறைவான அறிவழகனை பண்ருட்டி மது விலக்கு அமல் பிரிவு வலைவீசி தேடி வருகின்றனர்.