காலை 10 மணி முதல் மாலை 4 மணி வரை இன்று முதல் கடைகளை திறக்க அனுமதி: கலெக்டர் மெகராஜ் பேட்டி

நாமக்கல், 

நாமக்கல் மாவட்ட கலெக்டர் அலுவலக கூட்டரங்கில் கடைகள் மற்றும் வர்த்தக நிறுவனங்கள் செயல்படுவது குறித்து வணிகர் சங்க நிர்வாகிகள் கலந்து கொண்ட ஆலோசனை கூட்டம் நேற்று நடைபெற்றது. கூட்டத்துக்கு கலெக்டர் மெகராஜ் தலைமை தாங்கினார். போலீஸ் சூப்பிரண்டு அருளரசு முன்னிலை வகித்தார்.

கூட்டத்தில் இன்று (செவ்வாய்க்கிழமை) முதல் ஹார்டுவேர், செல்போன் கடை உள்ளிட்ட கடைகளை திறக்க அனுமதி அளிக்கப்பட்டது. ஆனால் அனைத்து கடைகளிலும் பொதுமக்கள் சமூக இடைவெளியை பின்பற்ற உரிய வழிவகை செய்ய வேண்டும் என அறிவுறுத்தப்பட்டது.

இதையடுத்து கலெக்டர் மெகராஜ் நிருபர்களுக்கு பேட்டி அளித்தபோது கூறியதாவது:-

ஊரடங்கு வருகிற 17-ந் தேதி வரை நீட்டிக்கப்பட்டு உள்ளது. அதில் சில தளர்வுகளும் அனுமதிக்கப்பட்டு உள்ளன. அதன்படி இன்று முதல் கூடுதலாக சில கடைகளை திறக்க அனுமதி அளிக்கப்பட்டு உள்ளது.

கடை ஊழியர்கள் தன் சுத்தம் பேணுவது, கடைகளில் சமூக இடைவெளியை கடைபிடிப்பது, முக கவசம் அணிந்து வர வலியுறுத்துவது, கடைகளில் கை சுத்திகரிப்பான் வைப்பது தொடர்பாக வணிகர்களுக்கு ஆலோசனை வழங்கப்பட்டது. அவர்களும் உரிய ஒத்துழைப்பு தருவதாக தெரிவித்து உள்ளனர்.

அழகு நிலையம், உடற்பயிற்சி கூடம், டீக்கடை போன்றவற்றை கிராமப்புறமாக இருந்தாலும் சரி, நகர்ப்புறமாக இருந்தாலும் சரி திறக்க அனுமதி இல்லை. இதேபோல் நகர்ப்புறங்களில் சூப்பர் மார்க்கெட், பல்பொருள் அங்காடி, ஏ.சி.வசதியுடன் கூடிய வணிக நிறுவனங்கள் போன்றவற்றை திறக்க கூடாது.

காய்கறி மற்றும் மளிகை கடைகள் காலை 6 மணி முதல் மாலை 4 மணி வரை திறந்து இருக்கலாம். ஓட்டல்கள் காலை 6 மணி முதல் இரவு 9 மணி வரை திறந்து இருக்கலாம். ஆனால் பார்சல் கொடுக்க மட்டுமே அனுமதி உண்டு. இரும்பு மற்றும் சிமெண்டு உள்ளிட்ட ஹார்டுவேர்ஸ் கடைகள், செல்போன் கடைகள், கண்ணாடி கடைகள் மற்றும் பழுது நீக்கும் கடைகள் காலை 10 மணி முதல் மாலை 4 மணி வரை மட்டுமே திறந்து இருக்கும்.

இறைச்சி கடைகளை பொறுத்த வரையில் சமூக இடைவெளியை பின்பற்றி நடத்தலாம். விதிமீறல் இருந்தால் கடைக்கு ‘சீல்’ வைக்கப்படும். நாமக்கல் மாவட்டத்தில் இருந்து முட்டைகளை ஏற்றி செல்லும் லாரிகளை சோதனை செய்வது இல்லை. முட்டைகளை இறக்கிவிட்டு வரும் லாரிகளை மட்டுமே சோதனை செய்கிறோம். இதனால் எவ்வித இடையூறும் இல்லை.

சோதனை சாவடிகளில் இதுவரை 250 பேருக்கு கொரோனா பரிசோதனை மேற்கொள்ளப்பட்டு உள்ளது. இதில் 170 பேருக்கு கொரோனா இல்லை என முடிவு வந்து உள்ளது. நாமக்கல் மாவட்டத்தில் இதுவரை முக கவசம் அணியாமல் வந்தவர்களுக்கு ரூ.2 லட்சத்து 20 ஆயிரம் அபராதம் விதிக்கப்பட்டு உள்ளது என்று அவர் கூறினார்.